Qəfil ölümlərin görünməyən TƏHLÜKƏSİ: Beyin anevrizması həyat üçün necə risk yaradır?

TİBB

263

27.07.2026, 12:59

Müasir dövrdə heç bir əlamət büruzə vermədən inkişaf edən və birdən-birə həyati təhlükə yaradan xəstəliklərin sayı artmaqdadır. Bunların arasında xüsusilə qəfil ölümlərə səbəb olan damar patologiyaları ön sırada dayanır. Beyin qan damarlarında yaranan anevrizmalar insan orqanizmi üçün gözlənilməz və ağır fəsadlar doğuran ciddi problemlərdəndir. Çox vaxt gizli şəkildə irəliləyən bu patologiya gərginlik, stres və ya digər səbəblərdən damarın yırtılması ilə nəticələnə bilir. Damarın yırtılması isə ölümcül beyin qanamalarına və qəfil həyat itkilərinə gətirib çıxarır. Mütəxəssislər bildirirlər ki, vaxtında aparılan müayinələr vasitəsilə bu riskləri öncədən müəyyən etmək mümkündür. Kompüter Tomoqrafiya (KT) və MR angioqrafiya kimi müasir müayinə üsulları xəstəliyi erkən mərhələdə aşkarlamağa imkan verir. Bu cür erkən diaqnostika isə bir çox hallarda insanın həyatını xilas edən ən vacib addımdır.

Mövzu ilə bağlı Oxu24.com-a Diaqnoz Tibb Mərkəzinin Tibb üzrə Fəlsəfə Doktoru, radioloq Aydın Mirzəyev mühüm açıqlamalar verib.

"Beyin anevrizmaları qəfil ölümlərin əsas səbəblərindəndir"

Kompüter Tomoqrafiya (KT) angioqrafiya müayinəsindən keçən pasiyentin görüntülərini təqdim edən radioloq Aydın Mirzəyev bildirib ki, anevrizma beyin qan damarlarında incəlmə və bu incəlməyə bağlı olaraq balon və ya torba şəklində genişlənmə ilə xarakterizə olunur:

"Anevrizmaların əsasən sakkulyar (torbaşəkilli) və fuziform kimi növləri var. Son zamanlar infeksiyalara bağlı olan mikotik anevrizmalardan da istifadə olunur, lakin bunlar nadir rast gəlindiyi üçün daha çox diqqət yetirdiyimiz sakkulyar və fuziform anevrizmalardır”.

Pasiyentin KT angioqrafiya müayinəsini şərh edən həkim, damarlarda müşahidə olunan ciddi dəyişiklikləri diqqətə çatdırıb:

"Müayinə zamanı basilyar arteriya səviyyəsində fuziform anevrizma aşkarlanıb. Lakin bundan da önəmli bir görüntü sağ yuxu arteriyasının kavernoz seqmentində milimetrik ölçüdə sakkulyar anevrizmanın olmasıdır. Bu, gələcəkdə xəstə üçün çox ciddi əhəmiyyət kəsb edən və olduqca təhlükəli bir mənzərədir”.

“Qısa gərginlik və ya stres damarın yırtılmasına səbəb ola bilər”

Mütəxəssisin sözlərinə görə, bu cür anevrizmalar istənilən an böyük fəsadlara yol aça bilər:

"Qısa bir təzyiq, ani gərginlik, stres və ya başqa amillər zamanı bu anevrizmaların yırtılması və ölümcül beyin qanamalarına səbəb olması ehtimalı yüksəkdir. Ətrafımızda tez-tez eşitdiyimiz qəfil ölümlərin ciddi səbəblərindən biri məhz beyin anevrizmasının yırtılmasıdır."

Aydın Mirzəyev sonda vurğulayıb ki, bu kimi əlamətləri və ya ehtimalları KT və ya MR angioqrafiya müayinələri ilə öncədən ortaya qoymaq birbaşa insan həyatını xilas edir.

Həmçinin oxuyun