Bağırsaq polipləri gənclərdə də artıb – Həkim xəbərdarlıq edir  

Son illər dünyada müşahidə olunan bir çox xəstəlik kimi bağırsaq problemləri də “cavanlaşmağa” başlayıb. Əvvəllər əsasən yaşlı insanlarda rast gəlinən bağırsaq polipləri artıq gənclər və hətta uşaqlar arasında da aşkarlanır. Həkimlər bildirirlər ki, bu dəyişiklik həyat tərzi, qidalanma vərdişləri və genetik faktorlarla əlaqəli ola bilər.

Mövzu ilə bağlı Oxu24.com saytına açıqlama verən qastroenteroloq Tərlan Qasımov bildirib ki, bağırsaq polipləri uzun illər əsasən orta və yaşlı yaş qrupunda müşahidə olunsa da, son dövrlərdə daha gənc insanlarda da bu hallara rast gəlinir. Onun sözlərinə görə, hətta 5-15 yaş arası uşaqlarda belə “juvenil polip” adlanan polip növü aşkarlana bilir.

Həkim qeyd edib ki, uşaqlarda yaranan juvenil poliplər adətən yüksək risk qrupuna aid edilməsə də, müəyyən simptomlarla özünü göstərə bilir. Xüsusilə bağırsaq qanaxmaları, rektal qanama və nəcisdə qan izləri bu halların əsas əlamətlərindən hesab olunur. Bu səbəbdən valideynlər uşaqlarda belə simptomlara laqeyd yanaşmamalıdırlar.

Qastroenteroloqun sözlərinə görə, bağırsaq poliplərinin ən təhlükəli formalarından biri adenomatoz poliplərdir. Məhz bu poliplər zamanında aşkarlanıb müalicə olunmadıqda bağırsaq xərçənginə çevrilmə riski daşıyır. Həkim bildirir ki, bağırsaq xərçəngi bir çox hallarda məhz ilkin mərhələdə zərərsiz görünən poliplərdən inkişaf edir.

Tərlan Qasımov vurğulayıb ki, poliplər uzun müddət heç bir əlamət vermədən inkişaf edə bilər. Bu isə xəstəliyin gec aşkarlanmasına səbəb olur. Bəzi insanlarda qarında köp, qəbizlik, ishal, qarın ağrıları və ya nəcisdə qan kimi əlamətlər müşahidə olunsa da, bir çox hallarda poliplər yalnız endoskopik müayinələr zamanı təsadüfən aşkarlanır.

Mütəxəssis qeyd edir ki, düzgün qidalanma, lifli qidaların qəbulu, işlənmiş və çox yağlı qidalardan uzaq durmaq, siqaret və alkoqoldan çəkinmək bağırsaq sağlamlığının qorunmasında mühüm rol oynayır. Xüsusilə ailəsində bağırsaq xərçəngi və ya polip problemi olan şəxslər mütəmadi müayinələrdən keçməlidirlər.

Həkim əlavə edib ki, erkən diaqnoz bağırsaq xərçənginin qarşısının alınmasında ən vacib amillərdən biridir. Çünki vaxtında aşkarlanan poliplərin endoskopik üsulla götürülməsi gələcəkdə ciddi ağırlaşmaların qarşısını ala bilir.

Sonda qastroenteroloq insanlara uzunmüddətli həzm problemlərini və bağırsaqla bağlı şikayətləri diqqətsiz qoymamağı tövsiyə edib. Onun sözlərinə görə, sadə görünən bəzi əlamətlər ciddi xəstəliklərin ilkin xəbərçisi ola bilər.

Nigar

Həmçinin oxuyun

Pensiyalar 9,3 faiz indeksləşdirilərək artırılıb  —  RƏSMİ AÇIQLAMA

SON DƏQİQƏ! Milli Məclis mühüm qərarlar qəbul edib 

Azərbaycan Lideri Şuşadan hansı mesajları verib? — Mötəbər tədbirin incə MƏQAMLARI

Şuşa Media Forumunda Prezidentin yanında diqqətçəkən xanım kimdir? - FOTOLAR