Stomatoloq: “Gec müraciət diş itkisinə səbəb olur”

TİBB

481

12.05.2026, 13:48

Stomatoloji sağlamlığa münasibət cəmiyyətdə hələ də bir sıra hallarda yanlış vərdiş və yanaşmalar üzərində formalaşır. Müşahidələr göstərir ki, bir çox insanlar diş və ağız boşluğu problemlərinə yalnız ağrı hiss etdikdən sonra diqqət yetirir, profilaktik müayinələri isə ya tamamilə nəzərə almır, ya da uzun müddət təxirə salır. Mütəxəssislər isə xəbərdarlıq edirlər ki, bu cür yanaşma sonradan daha ciddi fəsadlara, hətta diş itkisinə qədər gedib çıxa bilər.

Stomatoloq İsgəndər İsgəndərli Oxu24.com-a açıqlamasında bildirib ki, problemin əsas kökündə insanların stomatoloji xidmətə münasibətində formalaşmış yanlış stereotiplər dayanır. Onun sözlərinə görə, pasiyentlərin böyük əksəriyyəti stomatoloqa yalnız kəskin ağrı başladıqda və ya vəziyyət artıq dözülməz həddə çatdıqda müraciət etməyi düzgün hesab edir. Halbuki bu mərhələdə çox vaxt proses gecikmiş olur və dişi xilas etmək imkanı məhdudlaşır.

Həkim qeyd edib ki, belə hallarda ya müalicə çox mürəkkəbləşir, ya da dişin çəkilməsi qaçılmaz olur. Bəzən isə infeksiya və iltihab prosesləri genişlənərək sağlam toxumalara da zərər verir və nəticədə tək bir diş problemi daha ciddi ağız boşluğu xəstəliklərinə çevrilə bilir. Bu isə həm pasiyentin sağlamlığı, həm də müalicə müddəti baxımından əlavə çətinliklər yaradır.

İ.İsgəndərli gec müraciətin səbəbləri arasında iki əsas amili xüsusilə vurğulayır: maddi imkanlar və qorxu faktoru. Onun sözlərinə görə, bəzi insanlar müalicənin baha başa gələcəyini düşündüyü üçün problemi təxirə salır, digərləri isə stomatoloji müdaxilələrdən qorxaraq həkimə getməkdən çəkinirlər. Halbuki vaxtında edilən müraciət həm daha sadə, həm də daha az xərc tələb edən müalicə imkanı yaradır.

Həkim əlavə edib ki, gecikmə təkcə tibbi deyil, həm də iqtisadi baxımdan pasiyentə zərər vurur. Çünki zaman keçdikcə digər sahələrdə olduğu kimi stomatoloji xidmətlərin də qiymətində artım müşahidə olunur. Nəticədə, ilkin mərhələdə sadə bir müalicə ilə həll oluna biləcək problem sonradan daha geniş və bahalı prosedurlara çevrilir.

Eyni zamanda stomatoloq düzgün həkim seçiminin də mühüm əhəmiyyət daşıdığını qeyd edib. Onun sözlərinə görə, keyfiyyətli stomatoloji xidmət gələcəkdə yarana biləcək fəsadların qarşısının alınmasında əsas rol oynayır. O, bu məqamda xalq arasında geniş yayılan “ucuz ətin şorbası olmaz” ifadəsini xatırladaraq bildirib ki, çox aşağı qiymətə göstərilən xidmətlərdə istifadə olunan materialların keyfiyyəti hər zaman yüksək olmur və bu da sonradan əlavə sağlamlıq problemlərinə səbəb ola bilər.

Mütəxəssis sonda vurğulayıb ki, stomatoloji müayinələrə yalnız problem yarandıqda deyil, mütəmadi olaraq müraciət etmək daha düzgün yanaşmadır. Bu, həm dişlərin qorunmasına, həm də ümumi ağız sağlamlığının uzunmüddətli saxlanılmasına imkan yaradır.