Dubayda dilənçinin aylıq qazancı üzə çıxdı – məbləğ şok etdi

DÜNYA

10.08.2026, 11:40

2016-cı ildə Dubayda keçirilən əməliyyat zamanı küçələrdə dilənçilik edən bəzi şəxslərin topladığı böyük məbləğlərlə bağlı məlumatlar yenidən gündəmə gəlib.

Oxu24.com xəbər verir ki, həmin dövrdə BƏƏ-yə turist kimi daxil olaraq küçələrdə pul istəyən şəxslərə qarşı xüsusi əməliyyatlar keçirilib. Saxlanılan şəxslər arasında dilənçilikdən ciddi gəlir əldə edənlərin olduğu müəyyənləşdirilib.

Ən diqqətçəkən hallardan birində bir şəxsin gündə orta hesabla 9 min dirhəm topladığı müəyyən edilib. Bu məbləğ ay ərzində təxminən 270 min dirhəmə, yəni həmin dövrün məzənnəsi ilə təxminən 80 min dollara bərabər olub.

Məlumata görə, dilənçilik edən şəxslər əsasən insanların çox olduğu əraziləri seçiblər. Onlara xüsusilə cümə namazı zamanı məscidlərin ətrafında və yüksək gəlirli yaşayış məhəllələrində rast gəlinib.

Pul toplamaq üçün müxtəlif üsullardan istifadə edilib. Bəzi şəxslər xəstəlik, maddi çətinlik və ağır həyat şəraiti barədə danışaraq insanlardan yardım istəyiblər. Araşdırmalar zamanı bəzi qrupların isə dilənçilik fəaliyyətini sistemli şəkildə təşkil etdiyi, şəxslər arasında ərazilərin və istifadə olunacaq üsulların əvvəlcədən bölüşdürüldüyü məlum olub.

Səlahiyyətlilər bildiriblər ki, 270 min dirhəm bütün dilənçilərin aylıq gəlirini əks etdirmir. Bu rəqəm saxlanılan şəxslərdən birinin topladığı məbləğ kimi qeydə alınıb.

Hazırda BƏƏ-də küçə dilənçiliyi qadağandır. Qanunu pozan şəxslər cərimə və ya həbs cəzası ilə üzləşə, əcnəbilər isə ölkədən deportasiya edilə bilərlər.

Hakimiyyət orqanları yardım etmək istəyən şəxslərə ianələri küçədə dilənçilik edən insanlara deyil, rəsmi fəaliyyət göstərən xeyriyyə və yardım təşkilatlarına təqdim etməyi tövsiyə edir.

Həmçinin oxuyun