Cərrah əməliyyat qərarını necə verir?   

Cərrahiyyə sahəsində ən çox verilən suallardan biri və bəlkə də cəmiyyəti ən çox maraqlandıran məqam cərrahın əməliyyat qərarını necə verməsidir. Bir çox insanlar düşünür ki, həkimə müraciət edən hər bir xəstə mütləq şəkildə bıçaq altına yatmalıdır. Lakin tibb elmində və həkimlər arasında formalaşan yanaşmalar bu fikrin tamamilə yanlış olduğunu göstərir. Hər xəstəliyin və hər pasiyentin vəziyyəti fərdi şəkildə qiymətləndirilir. Xüsusilə döş qəfəsi cərrahiyyəsi kimi həssas sahələrdə dəqiq diaqnostika əsas rol oynayır. 

Oxu24.com xəbər verir ki, cərrahlar arasında "Ən yaxşı əməliyyat baş tutmayan əməliyyatdır" deyimi mövcuddur. Bu o deməkdir ki, cərrah hər yanına gələn xəstəni əməliyyat etmir və hər xəstəliyin mütləq şəkildə əməliyyata göstərişi yoxdur.

Döş qəfəsi cərrahiyyəsində ən çox qarşılaşılan hallardan biri plevrit, yəni ağciyərlərin ətrafına plevral boşluğa maye yığılmasıdır. Bəzən miqdarından asılı olmayaraq, həmin mayeni boşaltmaq məcburiyyəti yaranır ki, burada həm diaqnostik vacibat durur, həm də xəstənin nəfəsinin düzəlməsi təmin edilir.

Amma bəzi plevrit hallarında, məsələn, ürək və ya böyrək çatışmazlığında xəstələrə ümumiyyətlə punksiya eləmirlər. Çünki bu zaman mayenin yığılma səbəbi ağciyər və ya plevra ilə deyil, birbaşa digər daxili orqanların fəaliyyətsizliyi ilə bağlıdır. Belə hallarda kardioloq və ya nefroloqun təyin etdiyi konservativ müalicə ilə maye sorulub gedir.

Böyük əməliyyatlara, məsələn, ağciyər xərçənginə gəldikdə isə, onkoloji xəstəliklərin müalicəsi müəyyən protokollar və mərhələlər üzrə aparılır:

•Dördüncü mərhələ: Ağciyər xərçəngi dördüncü mərhələdə adətən əməliyyat olunmur, çünki əməliyyat olunan və olunmayan xəstələrdə yaşam müddətində fərq müşahidə olunmur. Bu xəstələr yalnız konservativ müalicə, kimya və ya şüa terapiyası alırlar.

•Birinci və ikinci mərhələ (A variantı): Xəstəliyin ilkin mərhələlərində pasiyentləri birbaşa əməliyyat etmək imkanları olur.

•İkinci mərhələnin B variantı və üçüncü mərhələ: Bu mərhələlərdəki xəstələr adətən əvvəlcə kimyaterapiya alırlar, daha sonra isə əməliyyat olunurlar.

Nəticə etibarilə, cərrahın yanına getmək avtomatik olaraq mütləq əməliyyat olunacağınız anlamına gəlmir; hər bir qərar xəstəliyin xarakterindən və mərhələsindən asılı olaraq verilir.

Jalə

Həmçinin oxuyun

Son dəqiqə! Milli Məclisin bu qərarları qəbul etməsinə günlər qaldı

İlham Əliyevdən mühüm sərəncam:2027–2029-cu illərdə ...

Prezidentdən yeni təyinatlar — FOTO

Azərbaycanın turizm imkanları İstanbulda təqdim olunub