Burun çəpər əyriliyi ürək xəstəliklərinə səbəb ola bilərmi? – Kardioloqdan AÇIQLAMA  

Burun tıxanıqlığı və burunla nəfəs almaqda çətinlik bir çox insanın qarşılaşdığı problemlərdəndir. Bəzi hallarda bu şikayətlər burun çəpərinin əyriliyi ilə əlaqəli olur. Mütəxəssislər isə uzunmüddətli burun tıxanıqlığının xüsusilə yuxu zamanı tənəffüsə və ümumi həyat keyfiyyətinə mənfi təsir göstərə biləcəyini bildirirlər.

Burun çəpərinin əyriliyi birbaşa ürək xəstəliyinə səbəb olmasa da, tənəffüsün uzun müddət çətinləşməsi və yuxu problemləri ürək-damar sisteminə əlavə yük yarada bilər.

Mövzu ilə bağlı Oxu24.com-a açıqlama verən həkim-kardioloq Aynur Məmmədova bildirib ki, burun çəpərinin əyriliyi özü birbaşa ürək xəstəliyi yaratmır, lakin bəzi hallarda ürək-damar sisteminə dolayı təsir göstərə bilər.

Onun sözlərinə görə, uzun müddət davam edən tənəffüs çətinliyi zamanı orqanizmin oksigenlə təminatında problemlər yarana və ürək kompensator mexanizmlərlə daha sürətli işləyə bilər:

“Bu zaman taxikardiya, yəni ürək döyüntülərinin sürətlənməsi müşahidə oluna bilər. Davamlı və uzunmüddətli ritm pozuntuları isə ürək-damar sistemi üçün əlavə risklər yarada bilər”.

Kardioloq qeyd edib ki, burun çəpərinin əyriliyi yuxu keyfiyyətinə də təsir göstərə bilər:

“Pasiyentlər gecələr rahat nəfəs ala bilmədikdə yuxuları pozulur. Yuxu keyfiyyətinin aşağı düşməsi stress hormonlarının artmasına, qan təzyiqinin dəyişməsinə və ürək döyüntülərinin sürətlənməsinə səbəb ola bilər. Xüsusilə yanaşı olaraq yuxu apnesi olan şəxslərdə ürək-damar riskləri daha ciddi qiymətləndirilməlidir”.

A.Məmmədova burun çəpərinin əyriliyi, davamlı burun tıxanıqlığı və burunla nəfəs almaqda çətinlik yaşayan şəxslərə LOR həkiminə müraciət etməyi tövsiyə edib.

“Əgər insan uzun müddət burunla rahat nəfəs ala bilmir, gecələr ağızla nəfəs almağa məcbur olur, xoruldama və yuxu problemləri yaşayırsa, səbəb mütləq araşdırılmalıdır. Zərurət yaranarsa, LOR mütəxəssisi tərəfindən müvafiq müalicə və ya cərrahi korreksiya məsələsinə baxıla bilər”, – deyə həkim vurğulayıb.

Həmçinin oxuyun

Cinayət işi: Könül Kərimovanın da adı hallanır – DETALLAR 

Universitetə qəbul olunanlara vacib xəbər: Qeydiyyat üçün LİNK...

Azərbaycanda bu qərar 1 sentyabrdan qüvvəyə minəcək  — DETALLAR

SON DƏQİQƏ! AZAL  vacib açıqlama yaydı