İsti havalarda soyuq su içmək təhlükəlidirmi?

TİBB

13.07.2026, 14:15

Xüsusilə yay aylarında insanlar susuzluqlarını yatırmaq üçün buz kimi soyuq suya üstünlük verirlər. Lakin son illər soyuq suyun orqanizmə təsiri ilə bağlı müxtəlif fikirlər səsləndirilir. Bəzi mütəxəssislər hesab edirlər ki, həddindən artıq soyuq su qəbul etmək həzm sisteminin fəaliyyətinə mənfi təsir göstərə və orqanizmdə müəyyən narahatlıqlara səbəb ola bilər.

Oxu24.com xəbər verir ki, mütəxəssislərin sözlərinə görə, insan orqanizmi təxminən 36,5–37 dərəcə temperaturda fəaliyyət göstərir və həzm sistemi də bu temperatura uyğun işləyir. Su qəbul edildikdən sonra onun əsas hissəsi bağırsaqlarda sorulur. Əgər qəbul edilən su çox soyuqdursa, orqanizm əvvəlcə həmin suyu öz temperaturuna yaxınlaşdırmağa çalışır. Bu proses isə müəyyən qədər vaxt aparır və suyun sorulmasını nisbətən ləngidə bilər.

Bildirilir ki, soyuq su bağırsaqlarda daha uzun müddət qaldıqda həzm prosesi də bir qədər yavaşıya bilər. Həzm sistemində olan qida qalıqları və digər maddələrlə daha uzun təmasda qalması bəzi insanlarda köp, narahatlıq və həzm pozğunluğu hissi yarada bilər. Xüsusilə həssas həzm sistemi olan şəxslərdə bu hallar daha çox müşahidə oluna bilər.Bəzi insanlarda buz kimi soyuq su içildikdən sonra mədədə spazm, qarında sancı və ya narahatlıq hissinin yaranması da bununla əlaqəlidir. Soyuq temperatur həzm sistemindəki damarların müvəqqəti daralmasına səbəb ola və həzm prosesini qısa müddətə ləngidə bilər.Bundan başqa, bəzi həkimlər hesab edirlər ki, çox soyuq su qəbul edən insanlar qısa müddət sonra yenidən susuzluq hiss edə bilərlər. Bunun səbəbi isə orqanizmin suyu əvvəlcə qızdırmağa enerji sərf etməsi və optimal temperatur əldə olunduqdan sonra onun tam şəkildə mənimsənilməsidir.

Mütəxəssislər bildirirlər ki, xüsusilə yeməkdən dərhal sonra buz kimi soyuq su qəbul etmək həzm prosesini ləngidə bilər. Buna görə də otaq temperaturunda və ya ilıq su içmək həm həzm sistemi, həm də ümumi orqanizm üçün daha rahat hesab olunur.Onların fikrincə, sağlam insanlarda arabir soyuq su içmək ciddi problem yaratmasa da, mədə-bağırsaq sistemi xəstəliklərindən əziyyət çəkən, qastrit, reflüks, bağırsaq spazmı və digər həzm problemləri olan şəxslərin buz kimi soyuq içkilərdən mümkün qədər uzaq durmaları tövsiyə edilir.

Mütəxəssislər sonda vurğulayırlar ki, əsas məqsəd kifayət qədər su qəbul etməkdir. Gün ərzində orqanizmin ehtiyacına uyğun miqdarda, mümkün qədər otaq temperaturunda və ya ilıq su içmək həm həzm sisteminin normal fəaliyyətini dəstəkləyir, həm də suyun orqanizm tərəfindən daha rahat mənimsənilməsinə kömək edir. Bununla yanaşı, sağlam həyat tərzi, balanslı qidalanma və kifayət qədər maye qəbulu ümumi sağlamlığın qorunmasının vacib şərtlərindən hesab olunur.

Nigar

Həmçinin oxuyun