Pensiya yaşına çatıb qeyri-rəsmi işləyənlərə vacib xəbər – Ekspertdən VACİB AÇIQLAMA  

Azərbaycanda pensiya yaşına çatdıqdan sonra da əmək fəaliyyətini davam etdirən şəxslərin sayı kifayət qədər çoxdur. Lakin onların bir çoxu rəsmi əmək müqaviləsi olmadan, qeyri-rəsmi şəkildə çalışmağa üstünlük verir. Bu hal həmin şəxslərin gələcəkdə pensiyalarının yenidən hesablanması və məbləğinin artırılması ilə bağlı ciddi suallar doğurur. Xüsusilə, sosial sığorta haqları ödənilmədiyi halda pensiya kapitalının dəyişib-dəyişməməsi və əlavə pensiya hüququnun yarana biləcəyi məsələsi vətəndaşları düşündürür.

Mütəxəssislər bildirirlər ki, rəsmi əmək müqaviləsinin olmaması pensiyaçının gələcəkdə daha yüksək təqaüd almaq imkanlarını ciddi şəkildə məhdudlaşdırır. Oxu24.com xəbər verir ki, qeyri-rəsmi çalışan pensiyaçıların ödənişlərinin artırılmasının mümkünlüyü məsələsinə iqtisadçı ekspert aydınlıq gətirib.

Mövzu ilə bağlı Oxu24.com-a açıqlama verən Liberal İqtisadçılar Mərkəzinin sədri Akif Nəsirli bildirib ki, Azərbaycanda yaşa görə əmək pensiyası təyin edildikdən sonra pensiyanın artırılması əsasən iki amildən asılıdır:

•Dövlət tərəfindən aparılan indeksləşdirmə;

•Pensiyaçı işləməyə davam edirsə, onun adına ödənilən məcburi dövlət sosial sığorta haqları.

Ekspert vurğulayıb ki, pensiya yaşına çatdıqdan sonra qeyri-rəsmi işləyən şəxslərin adına sosial sığorta ödənişləri həyata keçirilmədiyi üçün bu fəaliyyət gələcəkdə pensiyanın yenidən hesablanmasına əsas vermir:

"Pensiya kapitalı yalnız rəsmi əmək münasibətləri çərçivəsində ödənilən sığorta haqları hesabına artır. Qeyri-rəsmi işləyən şəxslər yalnız bütün pensiyaçılar kimi dövlət tərəfindən aparılan illik indeksləşdirmədən yararlana bilərlər. Lakin qeyri-rəsmi işlədikləri dövr onların fərdi pensiya kapitalına əlavə olunmur və bu müddət əlavə pensiya hüququ yaratmır”.

Akif Nəsirlinin sözlərinə görə, bu baxımdan həm işçilər, həm də işəgötürənlər üçün əmək münasibətlərinin rəsmiləşdirilməsi böyük əhəmiyyət daşıyır. Rəsmi əmək müqaviləsi olduqda ödənilən sosial sığorta haqları gələcəkdə pensiyanın məbləğinin yenidən hesablanmasına və daha yüksək pensiya almaq imkanına birbaşa təsir göstərir. Qeyri-rəsmi məşğulluq isə vətəndaşların bu hüquqlardan istifadə imkanını tamamilə məhdudlaşdırır.

Çimnaz Telmanqızı

Həmçinin oxuyun

Azərbaycanın tanınmış şairi VƏFAT ETDİ 

Bakı-Ankara münasibətləri niyə hədəfə çevrilib? — TƏHLİL

11 oktyabrda bizi nələr gözləyir?  — ULDUZ FALI

Ailələrə uşaq sayına görə pul veriləcək? – Azərbaycanda yeni mexanizm tətbiq oluna bilər