Küçədə siqaret çəkənlər hansı halda cərimələnə bilər?  

İctimai yerlərdə siqaret çəkilməsi ilə bağlı tətbiq olunan məhdudiyyətlər və cərimələr vətəndaşlar arasında tez-tez müzakirə olunan məsələlərdəndir. Xüsusilə küçədə, səki kənarında və ya açıq havada siqaret çəkən şəxslərin inzibati məsuliyyətə cəlb edilib-edilməyəcəyi ilə bağlı suallar yaranır. Bəzən vətəndaşlar küçədə siqaret çəkdiklərinə görə cərimələnə biləcəklərini düşünür, bəziləri isə siqaret kötüyünü yerə atmağın ayrıca hüquqi məsuliyyət yaratdığından xəbərsiz olurlar.

Bəs qanunvericilik küçədə siqaret çəkməyi qadağan edirmi? Ümumiyyətlə, hansı ərazilərdə tütün məmulatlarından istifadəyə görə cərimə tətbiq olunur?

Oxu24.com-un məlumatına görə, məsələ ilə bağlı hüquqi yanaşmaya görə, Azərbaycanda tütün məmulatlarının istifadəsinə dair məhdudiyyətlər konkret qanunvericilik aktları ilə müəyyən edilir.

“Tütün məmulatlarının istifadəsinin məhdudlaşdırılması haqqında” Qanunun 10-cu maddəsində tütün çəkilməsinə icazə verilməyən yerlər sadalanıb.

Bu siyahıda təhsil və səhiyyə müəssisələri, uşaq meydançaları, ictimai nəqliyyat vasitələri və dayanacaqları, eləcə də qanunla müəyyən edilmiş digər məkanlar yer alır.

Hüquqi izaha əsasən, küçədə siqaret çəkməyin özü, əgər həmin yer qanunla müəyyən edilmiş qadağan olunmuş ərazilər sırasına daxil deyilsə, inzibati xəta hesab edilmir. Başqa sözlə, şəxs adi küçədə və qanunla qadağa qoyulmayan açıq ərazidə siqaret çəkdiyinə görə cərimələnə bilməz. Belə bir halda tətbiq olunan cərimənin hansı hüquqi normaya əsaslandığı və ərazinin qanunla müəyyən edilmiş qadağalardan birinə aid olub-olmadığı araşdırılmalıdır.

Bu məsələdə Azərbaycan Respublikasının İnzibati Xətalar Məcəlləsinin 212-ci maddəsi xüsusi əhəmiyyət daşıyır.

Məcəllənin 212.1-ci maddəsinə əsasən, tütün məmulatlarının istifadəsinin məhdudlaşdırılması haqqında qanunvericiliklə qadağan edilmiş yerlərdə tütün çəkməyə görə 30 manat məbləğində cərimə nəzərdə tutulur. Yəni məsuliyyət şəxsin sadəcə siqaret çəkməsinə görə deyil, bunu qanunla qadağan edilmiş məkanda etməsinə görə yaranır.

Digər tərəfdən, vətəndaşların diqqət etməli olduğu daha bir məqam siqaret kötüklərinin ətrafa atılmasıdır. Bəzi şəxslər siqaret çəkmək üçün qadağan olunmayan yeri seçsələr də, istifadə etdikləri siqaretin kötüyünü səkiyə, yola, yaşıllıq sahəsinə və ya digər ictimai əraziyə atırlar. Halbuki bu hərəkət ayrıca inzibati məsuliyyət yarada bilər.

İnzibati Xətalar Məcəlləsinin 212.4-cü maddəsinə əsasən, tütün məmulatları tullantılarının, o cümlədən siqaret kötüklərinin ətraf mühitə atılmasına görə 300 manat məbləğində cərimə nəzərdə tutulur. Bu norma ictimai yerlərin təmizliyinin qorunmasına və ətraf mühitin tütün tullantıları ilə çirkləndirilməsinin qarşısının alınmasına xidmət edir.

Beləliklə, küçədə siqaret çəkməklə siqaret kötüyünü yerə atmaq hüquqi baxımdan fərqli əməllərdir. Birinci halda ərazi qanunla qadağan edilmiş yerlər siyahısına daxil deyilsə, siqaret çəkilməsinə görə cərimə tətbiq olunmur. İkinci halda isə siqaret kötüyünün ətraf mühitə atılması 300 manat məbləğində cəriməyə səbəb ola bilər. Vətəndaşlar cərimə ilə üzləşdikdə onun hansı maddəyə əsaslandığını öyrənməli, inzibati xəta haqqında protokol və ya qərarda göstərilən hüquqi əsasla tanış olmalıdırlar.

Turan Etibaroğlu

Həmçinin oxuyun

Küçədə siqaret çəkənlər hansı halda cərimələnə bilər?  

Emin Ağalarov 99 milyon dollarlıq LAYİHƏ EDƏCƏK

Məzuniyyətlə bağlı MÜHÜM DƏYİŞİKLİK:Hansı günləri nağdlaşdırmaq mümkün olmayacaq?

Zakir Qaralovun əmisi qızı təqaüdə göndərildi