Azərbaycan Ordusu hücuma keçəcək? - Polkovnik açıqladı

Xəbər verdiyimiz kimi, 13 may tarixində saat 12:00-dan başlamaqla Qazax ra­yo­nunun Abbasbəyli kəndi, kənd yaxınlığındakı sərhəd-döyüş məntə­qələ­rimiz, həmin istiqamətdə avtomobil yolu ilə hə­rə­kət edən hərbi və mülki nəqliyyat vasitə­ləri İcevan rayonunun Berkaber kəndi yaxın­lığında yerlə­şən Er­mə­nistan silahlı qüvvə­lərinin bölmə­ləri tə­rə­fin­dən iriçaplı si­lah­­lardan və snayper tüfənglərindən intensiv atəşə tutulub, bir neçə yaşayış evinin damına zərər dəyib.

Düşmən təxribatının qarşısı alınıb, Ermənistan silahlı qüv­­­vələrinin döyüş möv­­qeləri cavab atəşi ilə sus­durulub.

Həmçinin, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin təsdiq etdiyi plana əsasən, mayın 18-dən 22-dək Azərbaycan Ordusunun genişmiqyaslı əməliyyat-taktiki təlimləri keçiriləcək.

Bu təlimlərin Qazax istiqamətində olan təxribatla əlaqəsinin olub-olmadığını öyrənmək məqsədilə ehtiyatda olan polkovnik Şair Ramaldanovla əlaqə saxladıq.

Polkovnik Publika.az-a açıqlamasında bildirdi ki, Azərbaycan Ordusu düşməni layiqli şəkildə susdurmağa və öz torpaqlarını işğaldan azad etməyə hər an hazırdır:

“Düşmənin təxribatı mütəmadi olaraq gah çoxalır, gah da azalır. Onlar daim gərginliyi saxlamaq istəyir. Ermənistan üçün bu gərginlik vacibdir. Bizim üçün əsas missiya isə düşmənin təxribatını layiqli şəkildə cavab atəşi ilə susdurmaqdır. Çünki geridə yaşayış məntəqələrimiz, əhalimiz və önəmli yollarımız var. Qazax istiqamətində Dövlət Sərhəd Xidmətinin hərbçiləri layiqli şəkildə öz xidmətlərini təşkil edirlər. Bu təxribatların törədilmə səbəblərindən biri də düşmənin daxildəki problemlərdən cəmiyyətin diqqətini yayındırmaq istəyidir.

Düşmən cavab atəşini öz mətbuatında işıqlandıraraq, nifrəti Azərbaycana yönəldib problemlərin həllindən kənarlaşmaq istəyir. Təlimlərin isə təxribatla əlaqəsi olmadığını düşünürəm. Azərbaycan döyüş planına uyğun olaraq bir neçə dəfə irimiqyaslı təlimlər reallaşdırıb. Mayın 18-dən 22-dək həyata keçirilməsi planlaşdırılan əməliyyat-taktiki təlimlər də onlardan biridir. Düşmən təlimlərlə bağlı beynəlxalq qurumlara müraciət edib diqqəti bura yönəltmək istəyir. Ancaq bu əsassızdır. Çünki məlum təlimlərin baş tutması Azərbaycanın hüququdur. Bu təlimlər döyüş hazırlığını yüksəltməyə planlanıb. İşğal olunan torpaqlarla bağlı general-polkovnik Zakir Həsənov bir neçə dəfə məruzə edib ki, Azərbaycan Silahlı Qüvvələri Ali Baş Komandanın əmrini yerinə yetirməyə hazırdır”.