Qaynar xətt:

(+99450) 247 90 86

44 günlük müharibə təcrübəsi Gürcüstan ordusu ilə bölüşülə bilər — Hərbi ekspertdən MÜHÜM ŞƏRH  

44 günlük müharibə təcrübəsi Gürcüstan ordusu ilə bölüşülə bilər — Hərbi ekspertdən MÜHÜM ŞƏRH  

QARABAĞ

45

18.11.2026, 19:26

Google
Xəbərlərimizi Google-da izləyin
Yeniliklərdən dərhal xəbərdar olun
Abunə ol

Müdafiə naziri general-polkovnik Zakir Həsənov Azərbaycanda rəsmi səfərdə olan Gürcüstan Müdafiə Qüvvələrinin komandanı general-leytenant Giorgi Matiaşvili və onun rəhbərlik etdiyi nümayəndə heyətini qəbul edib. Müdafiə Nazirliyində baş tutan görüşdə tərəflər iki ölkə arasında mövcud olan dostluq və strateji tərəfdaşlıq münasibətlərinin ordular arasında əlaqələrin genişləndirilməsinə mühüm töhfə verdiyini vurğulayıblar. Nazir Zakir Həsənov Cənubi Qafqazdakı mövcud təhlükəsizlik mühiti fonunda hərbi əlaqələrin gələcəkdə daha da inkişaf etdirilməsinin vacibliyinə diqqət çəkib. İki qonşu dövlətin silahlı qüvvələri arasında qarşılıqlı etimadın gücləndirilməsi regional sabitliyin əsas təminatçılarından biri kimi qiymətləndirilir. Eyni zamanda, müasir hərbi çağırışlara cavab vermək üçün birgə fəaliyyət mexanizmlərinin təkmilləşdirilməsi xüsusi aktuallıq kəsb edir. Tərəflər hərbi əməkdaşlığın gələcək perspektivləri və yeni istiqamətlər üzrə fikir mübadiləsi aparıblar. Bəs Azərbaycan və Gürcüstan orduları arasında hansı istiqamətlərdə hərbi əməkdaşlığın genişləndirilməsi daha məqsədəuyğun hesab olunur?

Mövzu ilə bağlı Oxu24.com-a açıqlama verən hərbi ekspert Anar Şuşalı bildirib ki, Azərbaycan və Gürcüstan arasında mövcud olan dostluq və strateji tərəfdaşlıq münasibətləri hərbi sahədə əməkdaşlığın inkişafı üçün geniş imkanlar yaradır:

"Cənubi Qafqazda dəyişən geosiyasi vəziyyət, yeni təhlükəsizlik çağırışları və hərbi texnologiyaların sürətli inkişafı iki ölkənin silahlı qüvvələri arasında əlaqələrin daha da möhkəmləndirilməsini zəruri edir. Müdafiə naziri general-polkovnik Zakir Həsənovun Azərbaycanda rəsmi səfərdə olan Gürcüstan Müdafiə Qüvvələrinin komandanı general-leytenant Giorgi Matiaşvili ilə görüşündə də hərbi əməkdaşlığın gələcək perspektivləri müzakirə olunub. Görüşdə iki ölkə arasında dostluq və əməkdaşlıq münasibətlərinin ordular arasında əlaqələrin genişləndirilməsinə verdiyi töhfə xüsusi vurğulanıb".

Ekspertin sözlərinə görə, Azərbaycan və Gürcüstan orduları arasında əməkdaşlığın əsas istiqamətlərindən biri birgə hərbi təlimlərin genişləndirilməsi ola bilər:

"Taktiki və qərargah təlimləri hərbi qulluqçuların peşəkarlığının artırılması, qarşılıqlı fəaliyyət imkanlarının təkmilləşdirilməsi və müasir döyüş şəraitinə uyğunlaşma baxımından əhəmiyyətlidir. Azərbaycan Ordusunun 44 günlük Vətən müharibəsində qazandığı döyüş təcrübəsi, müasir hərbi idarəetmə və müxtəlif qoşun növlərinin əlaqələndirilmiş fəaliyyəti sahəsində əldə etdiyi nəticələr bu istiqamətdə təcrübə mübadiləsi üçün mühüm potensial yaradır".

Anar Şuşalı qeyd edib ki, müasir müharibələrdə pilotsuz uçuş aparatları, radioelektron mübarizə sistemləri, süni intellekt və rəqəmsal idarəetmə texnologiyaları mühüm rol oynayır:

"Bu baxımdan iki ölkə arasında hərbi-texniki əməkdaşlığın inkişafı, PUA-lara qarşı müdafiə vasitələrinin öyrənilməsi, kibertəhlükəsizlik və hərbi informasiya sistemlərinin qorunması sahəsində təcrübə mübadiləsi xüsusi əhəmiyyət daşıyır. Hərbi akademiyalar və təlim mərkəzləri arasında əlaqələrin genişləndirilməsi də əməkdaşlığın vacib istiqamətlərindəndir. Zabitlərin qarşılıqlı təlim proqramlarında iştirakı, hərbi mütəxəssislərin təcrübə mübadiləsi, hərbi tibb, logistika və müdafiə planlaşdırılması sahələrində birgə seminarların təşkili orduların peşəkar potensialının artırılmasına xidmət edə bilər".

Hərbi ekspert əlavə edib ki, Azərbaycan və Gürcüstanın regional nəqliyyat və enerji layihələrində mühüm mövqeyi hərbi əməkdaşlığın bu istiqamətini də aktuallaşdırır:

"Bakı-Tbilisi-Ceyhan neft kəməri, Cənubi Qafqaz Boru Kəməri və Bakı-Tbilisi-Qars dəmir yolu kimi strateji layihələrin təhlükəsizliyinin təmin edilməsi hər iki ölkənin ortaq maraqlarına uyğundur. Bu baxımdan kritik infrastrukturun mühafizəsi, terror təhdidlərinin qarşısının alınması və fövqəladə vəziyyətlərə hazırlıq sahələrində təcrübə mübadiləsi əhəmiyyətli nəticələr verə bilər. Bununla yanaşı, müdafiə sənayesi, hərbi texnikanın texniki xidməti və təmir-bərpası, ehtiyat hissələrinin təminatı sahələrində əməkdaşlığın imkanlarının araşdırılması da məqsədəuyğun olardı".

Müsahib vurğulayıb ki, Azərbaycan və Gürcüstan arasında hərbi əlaqələrin inkişafı yalnız ikitərəfli münasibətlərin möhkəmləndirilməsi deyil, bütövlükdə Cənubi Qafqazda təhlükəsizliyin və sabitliyin qorunması baxımından da əhəmiyyətlidir:

"Birgə təlimlər, hərbi təhsil, müasir texnologiyalar, kibertəhlükəsizlik və strateji infrastrukturun mühafizəsi kimi istiqamətlərdə əməkdaşlığın genişləndirilməsi hər iki ölkənin müdafiə imkanlarını gücləndirə bilər. Nəticə etibarilə, Azərbaycan və Gürcüstan orduları arasında qarşılıqlı etimadın möhkəmləndirilməsi, mövcud hərbi əlaqələrin yeni istiqamətlər üzrə inkişaf etdirilməsi regionda uzunmüddətli təhlükəsizlik mühitinin formalaşmasına mühüm töhfə verə bilər".

Çimnaz Telmanqızı