Deputatdan müjdə: WUF13-ün Azərbaycana uzunmüddətli iqtisadi dividendlər gətirəcəyi gözlənilir

CƏMİYYƏT

528

19.05.2026, 12:23

Vüqar Bayramov: "WUF13 Azərbaycanın qeyri-neft sektoruna və investisiya mühitinə böyük töhfə verəcək"

Xəbər verdiyimiz kimi, Azərbaycan növbəti dəfə mötəbər beynəlxalq tədbirə ev sahibliyi edir. COP29-dan sonra ölkəmizdə keçirilən ikinci ən böyük qlobal miqyaslı tədbir – 13-cü Ümumdünya Urban Forumudur (WUF13). İştirakçılıq səviyyəsinə görə dünyada ikinci ən böyük platforma hesab olunan bu forum xüsusilə ölkə iqtisadiyyatı, investisiya mühiti və turizm sektoru üçün yeni üfüqlər açır.

Mövzu ilə bağlı Oxu24.com-a açıqlama verən Milli Məclisin deputatı, tanınmış iqtisadçı Vüqar Bayramov WUF13-ün Azərbaycan üçün iqtisadi və strateji əhəmiyyətini şərh edib.

“45 min nümayəndə qeydiyyatdan keçib”

Vüqar Bayramov qeyd edib ki, forum miqyasına və iştirakçı sayına görə kifayət qədər yüksək səviyyəli bir platformadır:

“Ümumdünya Urban Forumu iştirakçılıq səviyyəsinə görə dünyada ikinci ən böyük tədbir hesab olunur. Artıq 45 minə yaxın nümayəndənin qeydiyyatdan keçməsi tədbirin nə dərəcədə nəhəng rəqəmlərə malik olduğunu göstərir. Bu, həm Bakının şəhərsalma və infrastruktur potensialının, həm də Azərbaycanın beynəlxalq arenadakı nüfuzunun növbəti nümayişidir".

“Qarabağ və Şərqi Zəngəzurun yeni modelləri dünyaya təqdim olunacaq”

Tədbirin paytaxtda keçirilməsinə baxmayaraq, onun coğrafi və ideoloji təsir dairəsi bütün ölkəni, xüsusən də işğaldan azad edilmiş əraziləri əhatə edəcək. Deputatın sözlərinə görə, forum Azərbaycanın müasir şəhərsalma təcrübəsini ixrac etmək üçün unikal şansdır:

“Bakının qabaqcıl şəhər infrastrukturu qonaqlara təqdim olunacaq. Qarabağ və Şərqi Zəngəzurda tətbiq edilən "Ağıllı kənd" (Smart Village) və "Ağıllı şəhər" (Smart City) konsepsiyaları, eləcə də unikal şəhərsalma modelləri WUF13 vasitəsilə dünya ictimaiyyətinə çatdırılacaq”.

WUF13-ün Azərbaycana həm qısamüddətli, həm də uzunmüddətli iqtisadi dividendlər gətirəcəyi gözlənilir. İqtisadçı deputat forumun ölkə iqtisadiyyatına təsirlərini üç əsas istiqamətdə qruplaşdırıb:

1.Turizm və xidmət sektoru: 45 minə yaxın nümayəndə heyətinin gəlişi otelçilik, iaşə, nəqliyyat və xidmət sektorunda kəskin canlanma (qısamüddətli iqtisadi aktivlik) yaradacaq. Bu, həm də ölkənin turizm potensialının gələcək təqdimatıdır.

2.Qeyri-neft sektoruna investisiya: Forum Azərbaycanın investisiya cəlbediciliyini artıracaq. Xüsusən də qeyri-neft sektorunun potensialı nümayiş etdiriləcək və xarici sərmayənin cəlbi üçün yeni qapılar açılacaq.

3.Uzunmüddətli əməkdaşlıq: Tədbir çərçivəsində qurulan əlaqələr gələcəkdə birgə infrastruktur layihələrinin icrasına və xarici tərəfdaşlarla uzunmüddətli müqavilələrin imzalanmasına zəmin yaradacaq.

Vüqar Bayramov vurğulayıb ki, qeyri-neft sektoru və infrastrukturun bu səviyyədə təqdimatı bütövlükdə ölkə iqtisadiyyatının davamlı inkişafına böyük töhfədir:

“COP29-dan sonra ikinci ən böyük tədbir hesab olunan WUF13 xüsusən də iqtisadiyyatın inkişafı ilə bağlı strateji hədəflərin reallaşması aspektindən Azərbaycan üçün müstəsna əhəmiyyətə malikdir".

Çimnaz Telmanqızı

Həmçinin oxuyun