Qatara bilet almaq istəyənlərə VACİB MƏLUMAT

CƏMİYYƏT

807

19.05.2026, 11:42

Xəbər verdiyimiz kimi,bu gün açıqlanan rəsmi məlumata görə,mayın 26-dan etibarən Bakı-Tiflis sərnişin qatarı fəaliyyətini bərpa edəcək.

Bu barədə Azərbaycan Dəmir Yolları QSC Bakı-Tiflis-Bakı marşrutu üzrə gündəlik sərnişin qatarlarının xidmətinin bərpası ilə bağlı məlumat yayıb.

ADY-dən Oxu24.com-a verilən məlumata görə, sərnişin qatarlarının fəaliyyəti 26 may 2026-cı il tarixindən bərpa olunacaq.

"Azərbaycan və Gürcüstan hökumətləri arasında imzalanmış Birgə Kommunikeyə əsasən, 26 may 2026-cı il tarixindən etibarən Bakı–Tiflis–Bakı marşrutu üzrə sərnişin qatarlarının fəaliyyəti bərpa olunacaq". - məlumatda qeyd olunur.

Oxu24.com oxuculara maarifləndirmə mövzusunda yazını təqdim edir:

Bilet almaq üçün tələb olunan sənədlər

Ölkədaxili istiqamətlərdə bilet satışı şəxsiyyəti təsdiq edən sənəd əsasında həyata keçirilir.

Şəxsiyyəti təsdiq edən sənədlərə daxildir:

Rayonlararası (şəhərlərarası) sərnişin qatarlarına gediş sənədi (bilet) rəsmiləşdirilən zaman səfər edən sərnişinin aşağıdakı sənədlərindən biri tələb edilir (əsli, surəti və ya my.gov.az portalından çıxarışı):

AR vətəndaşının şəxsiyyətini təsdiq edən sənəd (şəxsiyyət vəsiqəsi və ya Elektron Hökümət İnformasiya Sistemində şəxsiyyət vəsiqəsi məlumatları / QR kod (“My.gov.az” portalından qeydiyyatdan keçməklə));

Türkiyə Respublikasının vətəndaşlarının şəxsiyyətini təsdiq edən sənəd (TC – kimlik);

pasport (bütün növlər);

hərbi bilet-həqiqi hərbi qulluqda olanlar, əsgərlər (hərbi bileti olmadıqda əvəz edən məzuniyyət vərəqəsi) və kursantlar;

15 yaşına qədər uşaqlara doğum haqqında şəhadətnamə və ya şəxsiyyət vəsiqəsi. Yeni doğulmuş uşaqlara (bir ay müddətində) doğum evindən verilmiş arayış (ana və ya atanın adına pulsuz bilet yazılmalıdır);

azadlığa buraxılma barədə arayış (etibarlılıq müddəti bitməyən);

əcnəbilər və vətəndaşlığı olmayan şəxslərin Azərbaycan Respublikasının ərazisində müvəqqəti yaşamaq üçün icazə vəsiqəsi;

əcnəbilər və vətəndaşlığı olmayan şəxslərin Azərbaycan Respublikasının ərazisində daimi yaşamaq üçün icazə vəsiqəsi;

Səfirlik tərəfindən təsdiq edilmiş şəxsiyyəti təsdiq edən sənəd;

Xarici İşlər Nazirliyi tərəfindən verilən Diplomatik pasport;

Xarici İşlər Nazirliyində çalışan əcnəbi vətəndaşlara verilən xidməti vəsiqə;

Azərbaycan Respublikasına qayıdış şəhadətnaməsi;

BMT QAK tərəfindən verilən və bu şəxslərin ölkəmizdə qanuni yaşayışını təsdiq edən “Qaçqın himayə vəsiqəsi”nin ölkədaxili sərnişin qatarlarına biletlərin alınması və səfər etməsi üçün şəxsiyyəti təsdiq edən sənəd kimi qəbul edilir.

Əcnəbi vətəndaşların nəzərinə:

Azərbaycan Respublikasının Miqrasiya Məcəlləsinin 21-ci maddəsinə əsasən:

21.1. Azərbaycan Respublikasında 15 gündən artıq müvəqqəti olan əcnəbilər və vətəndaşlığı olmayan şəxslər olduğu yer üzrə qeydiyyata alınmalıdırlar.

21.5. Əcnəbilər və vətəndaşlığı olmayan şəxslər aşağıdakı müddətlərə qeydiyyata alınırlar:

21.5.1. Viza əsasında gələnlər – vizada göstərilən qalma müddətinə;

21.5.2. Viza tələb olunmayan qaydada gələnlər – 90 gün müddətinə.

Əlavə məlumatı Azərbaycan Respublikasının Miqrasiya Məcəlləsindən əldə edə və ya Dövlət Miqrasiya Xidməti ilə əlaqə saxlaya bilərsiniz.

Hazırladı: Jalə

Həmçinin oxuyun