Həkim  açıqladı: Dünyada ən çox ölümə səbəb olan xəstəlik hansıdır?  

Dünyada ölüm səbəbləri ilə bağlı aparılan araşdırmalar göstərir ki, bir çox insanın düşündüyünün əksinə olaraq ən təhlükəli amil nə müharibələr, nə yol-nəqliyyat hadisələri, nə də bəzi onkoloji xəstəliklərdir. Mütəxəssislərin fikrincə, ən geniş yayılmış və ən çox ölümə səbəb olan problemlərdən biri məhz arterial hipertenziya, yəni yüksək qan təzyiqidir.

Oxu24.com-a açıqlamasında kardioloq Azər Mustafayev bildirib ki, arterial hipertenziya “səssiz qatil” kimi tanınır. Çünki bu xəstəlik uzun müddət heç bir ciddi əlamət vermədən inkişaf edə bilir. Bir çox hallarda insan illərlə yüksək qan təzyiqindən əziyyət çəksə də, bundan xəbərsiz olur.

Həkimin sözlərinə görə, yüksək təzyiq birbaşa ölüm səbəbi kimi görünməsə də, o, həyati vacib orqanlara ciddi zərər vuraraq ağır fəsadlara gətirib çıxarır. Bunların başında ürək-damar xəstəlikləri, beyin qan dövranı pozğunluqları və böyrək çatışmazlığı gəlir. Xüsusilə infarkt və insult halları çox vaxt nəzarətsiz qalan yüksək təzyiqin nəticəsi olur.

Mütəxəssis qeyd edir ki, arterial hipertenziya damar divarlarını zədələyir, onların elastikliyini azaldır və zamanla damarların daralmasına səbəb olur. Bu isə orqanlara gedən qan axınını pozur və nəticədə həyati funksiyalar zəifləyir. Uzun müddət nəzarətsiz qaldıqda isə bu proses geri dönməz fəsadlarla nəticələnə bilər.

Kardioloq vurğulayır ki, problemin ən təhlükəli tərəfi onun “sakit” gedişatıdır. İnsanlar yalnız ciddi ağırlaşmalar baş verdikdən sonra həkimə müraciət edirlər. Halbuki xəstəliyin erkən mərhələdə aşkarlanması və nəzarət altına alınması mümkündür.

Bu baxımdan mütəxəssislər aşağıdakı məqamlara xüsusi diqqət yetirilməsini tövsiyə edirlər:

Qan təzyiqinin mütəmadi ölçülməsi

Duz və yağlı qidaların məhdudlaşdırılması

Fiziki aktiv həyat tərzi

Stressin idarə olunması

Siqaret və zərərli vərdişlərdən uzaq durmaq

Həkim əlavə edir ki, müasir tibbdə arterial hipertenziyanın effektiv müalicə üsulları mövcuddur və düzgün yanaşma ilə xəstəliyi nəzarətdə saxlamaq mümkündür.

Sonda kardioloq Azər Mustafayev qeyd edir ki, yüksək qan təzyiqinə laqeyd yanaşmaq ciddi səhvdir: “Bu xəstəliyə barmaq arası baxmaq olmaz. Vaxtında diaqnoz və düzgün müalicə yüz minlərlə insanın həyatını xilas edə bilər.”

Turan

Həmçinin oxuyun

Pensiya ilə bağlı vacib məlumat - 30 min manatı tez almaq üçün…

Kredit faizlərindən qaçanlara ŞAD XƏBƏR: Banklarda yeni dövr başlayır   

Prezidentin Fərmanı ilə yaradılan  yeni universitet necə OLACAQ? — EKSPERT AÇIQLADI

SON DƏQİQƏ! ABŞ İrana zərbələr endirdi