Axşam içki içmisinizsə, səhər avtomobil idarə etdiyinizə görə cərimə oluna bilərsinizmi?

HÜQUQ

641

09.06.2026, 17:00

Sürücülər arasında ən çox verilən suallardan biri də budur: “Axşam spirtli içki qəbul etmişəmsə, səhər avtomobil idarə edərkən polis məni saxlasa, cərimə oluna bilərəmmi?”

Mövzu ilə bağlı hüquqşünas Ziyafət Qarayeva Oxu24.com-a bildirib ki, burada əsas məsələ spirtli içkinin nə vaxt qəbul edilməsi deyil, tibbi müayinə zamanı orqanizmdə alkoqolun hansı səviyyədə aşkarlanmasıdır.

Onun sözlərinə görə, bəzi sürücülər axşam saatlarında spirtli içki qəbul etdikdən sonra səhər tam ayıq olduqlarını düşünsələr də, alkoqolun orqanizmdən xaric olunma sürəti hər insanda fərqli olur. Bu proses qəbul edilən içkinin miqdarından, insanın çəkisindən, yaşından, sağlamlıq vəziyyətindən və maddələr mübadiləsinin sürətindən asılıdır.

“Yadda saxlamaq lazımdır ki, spirtli içkinin qəbulundan sonra özünüzü normal hiss etməyiniz onun tam şəkildə orqanizmdən xaric olması demək deyil. Əsas göstərici tibbi müayinə nəticəsində qanda və ya nəfəsdə müəyyən edilən alkoqol səviyyəsidir”, – deyə hüquqşünas vurğulayıb.

Mütəxəssis qeyd edib ki, tibbi müayinə zamanı sürücünün orqanizmində alkoqolun miqdarı 0,3 promildən yuxarı müəyyən edilərsə, həmin şəxs sərxoş vəziyyətdə nəqliyyat vasitəsini idarə etmiş hesab olunur. Bu halda qanunvericilikdə nəzərdə tutulan inzibati məsuliyyət tədbirləri tətbiq edilə bilər.

Hüquqşünasın sözlərinə görə, bir çox insanlar “içkini axşam içmişəm, səhərə qədər təsiri keçib” düşüncəsi ilə sükan arxasına əyləşirlər. Lakin bəzi hallarda qəbul edilən alkoqolun miqdarından asılı olaraq onun qalıq təsiri səhər saatlarında da davam edə bilir və bu, sürücünün məsuliyyətə cəlb olunmasına səbəb olur.

“Qanun üçün vacib olan içkinin hansı saatda qəbul edilməsi deyil, nəqliyyat vasitəsini idarə etdiyiniz anda orqanizmdə alkoqolun olub-olmamasıdır. Əgər tibbi müayinə nəticəsində göstərici normadan yüksək çıxarsa, bu zaman sürücünün ‘mən içkini dünən axşam qəbul etmişdim’ arqumenti məsuliyyətdən azad etmir”, – deyə o bildirib.

Mütəxəssis sürücülərə tövsiyə edir ki, spirtli içki qəbul etdikdən sonra kifayət qədər vaxt keçmədən avtomobil idarə etməsinlər və özlərini yaxşı hiss etsələr belə, alkoqolun orqanizmdən tam xaric olduğuna əmin olmadan sükan arxasına əyləşməsinlər.

Hüquqşünas hesab edir ki, bu məsələdə ən təhlükəsiz seçim avtomobil idarə etməyi təxirə salmaqdır. Çünki sərxoş vəziyyətdə sükan arxasına əyləşmək təkcə cərimə və digər hüquqi məsuliyyətlə nəticələnmir, eyni zamanda həm sürücünün, həm də digər hərəkət iştirakçılarının həyatını ciddi təhlükə altına qoyur.

Hazırladı: Turan

Həmçinin oxuyun