10 gün müddətində şikayət  edə bilərsiniz

Hüquqşünas Aqşin İsgəndərov: “İnzibati xəta qərarlarından qanunla müəyyən edilmiş müddətdə şikayət verilə bilər”

İnzibati xətalarla bağlı çıxarılan qərarlardan şikayət verilməsi və həmin şikayətlərin baxılma qaydası qanunvericiliklə dəqiq şəkildə tənzimlənir. Bir çox hallarda vətəndaşlar barələrində qəbul edilən qərarlarla razılaşmadıqda hansı müddətdə və hara müraciət etməli olduqlarını bilmirlər.

Hüquqşünas Aqşin İsgəndərov Oxu24.com saytına açıqlamasında bildirib ki, inzibati xəta haqqında qərarın surəti şəxsə rəsmi qaydada təqdim edildiyi gündən etibarən həmin qərardan şikayət vermək hüququ yaranır.

Onun sözlərinə görə, ümumi qaydaya əsasən vətəndaş qərardan 10 gün müddətində şikayət edə bilər. Şikayət həm aidiyyəti üzrə yuxarı inzibati orqana, həm də birbaşa məhkəməyə təqdim oluna bilər.

Hüquqşünas qeyd edib ki, qanunvericiliyə əsasən verilmiş şikayətə də operativ şəkildə baxılması nəzərdə tutulur. Belə ki, təqdim olunan şikayətə 10 gün müddətində baxılaraq müvafiq qərar qəbul edilməlidir. Bu mexanizm vətəndaşların hüquqlarının qısa müddətdə müdafiəsinə xidmət edir.

Aqşin İsgəndərov əlavə edib ki, yol hərəkəti qaydalarının pozulması, yol hərəkətinin təhlükəsizliyinin təmin edilməsi və avtomobil yollarından istifadə qaydaları ilə bağlı inzibati xətalar üzrə ayrıca şikayət müddəti tətbiq olunur. Bu kateqoriyaya aid qərarlardan şikayət verilməsi üçün qanunvericilikdə 20 günlük müddət müəyyən edilib.

Hüquqşünas vurğulayıb ki, həmin müddətin hesablanması qərarın şəxsə rəsmi qaydada təqdim olunduğu tarixdən başlanır. Şikayətin gecikdirilməsi bəzi hallarda qərarın qüvvədə saxlanılmasına və hüquqi imkanların məhdudlaşmasına səbəb ola bilər.

Mütəxəssis vətəndaşlara tövsiyə edib ki, inzibati xəta haqqında qərar aldıqları zaman sənədləri diqqətlə oxusunlar, hüquqlarını araşdırsınlar və qanunla müəyyən edilmiş müddətlərə ciddi şəkildə əməl etsinlər.

Nigar

Həmçinin oxuyun

Əmək pensiyalarında və bu müavinətlərdə ARTIM OLACAQ - Deputat AÇIQLADI 

İcra başçısı üç qurumu birləşdirdi, yeni rəis təyin etdi - FOTO

Qaydalar TƏSDİQLƏNDİ: 1 sentyabr 2026-cı il tarixindən qüvvəyə minəcək

"Qaçqınkom" aylıq müavinətlə bağlı RƏSMİ AÇIQLAMA YAYDI