Əhalinin NƏZƏRİNƏ: Su hansı hallarda və necə kəsilə bilər? — QANUN NƏ DEYİR?  

Su gündəlik hayatımızda ən vacib və imtina edilməz tələbat vasitələrindən biridir. Lakin təchizatçı qurumlarla istehlakçılar arasında vaxtaşırı kommunal ödənişlər və ya xidmətin dayandırılması ilə bağlı müəyyən anlaşılmazlıqlar ortaya çıxır. Çox vaxt vətəndaşlar suyun hansı şərtlər daxilində, necə və nə vaxt kəsilə biləcəyi barədə kifayət qədər hüquqi məlumata sahib olmurlar.

Bu da bəzən mənzil mülkiyyətçilərinin öz hüquqlarını effektiv şəkildə qoruya bilməməsinə və ya əsassız müdaxilələrlə üzləşməsinə gətirib çıxarır. Mövzunun aktuallığını nəzərə alaraq,su təchizatının dayandırılmasının hüquqi tərəflərini və abonentlərin hüquqlarını mütəxəssis rəyi ilə diqqətinizə çatdırırıq.

Mövzu ilə bağlı Oxu24.com-a açıqlama verən vəkil Turan Abdullazadə bildirib ki, suyun verilməsinin dayandırılması əsasları Nazirlər Kabinetinin təsdiq etdiyi “Sudan istifadə Qaydaları”nın 8-ci bəndi və “Su təchizatı və tullantı suları haqqında” Azərbaycan Respublikasının Qanunu ilə tənzimlənir.

“Mütləq 1 ay öncədən xəbərdarlıq edilməlidir”

Vəkilin sözlərinə görə, qanunvericiliyə əsasən, abonentə suyun kəsilməsi ilə bağlı mütləq qaydada 1 ay öncədən xəbərdarlıq olunmalıdır:

"Su təchizatı müəssisəsi tərəfindən su haqqı təqdim edildikdən sonra 1 ay ərzində istehlakçı tərəfindən ödəniş edilmədikdə, müəssisənin suyun verilməsini dayandırmaq hüququ yaranır. Lakin burada ən mühüm məqam odur ki, su təchizatı müəssisəsi xəbərdarlığın həqiqətən də istehlakçıya çatdığına əmin olmalıdır”.

Xəbərdarlıq abonentə hansı yollarla çatdırıla bilər?

Turan Abdullazadə qeyd edib ki, xəbərdarlıq bildirişi aşağıdakı vasitələrlə təqdim edilə bilər:

•Poçt və rabitə göndərişləri vasitəsilə;

•Kütləvi informasiya vasitələri (KİV) ilə;

•Su təchizatı zonasında səsgücləndiricilər vasitəsilə.

İstehlakçı bildirişi aldıqdan sonra da tələbləri yerinə yetirməzsə, su təchizatı müəssisəsi obyekti ümumi şəbəkədən ayıra və ya məsələ ilə bağlı məhkəməyə müraciət edə bilər.

Turan Abdullazadə vurğulayıb ki, öncədən xəbərdarlıq edilmədən suyun dərhal kəsilməsinə yalnız bir istisna halda icazə verilir:

”Dini ekstremizm əleyhinə xüsusi əməliyyat aparıldıqda — Daxili İşlər Nazirliyi (DİN) və Dövlət Təhlükəsizliyi Xidmətinin (DTX) göstərişləri əsasında suyun verilməsi dərhal dayandırıla bilər”.

Çimnaz Telmanqızı

Həmçinin oxuyun

Dənizdə batan şəxs görün kim İMİŞ -FOTO

İlham Əliyev təbrik məktubu göndərdi

Məhərrəmlik nə vaxt bitir? 

Bakıda yeni dərs ilindən saatlar BELƏ OLACAQ