Emin Hüseynov: Ağdam, Füzuli və Xocavənddə texnologiyaya əsaslanan icmalar formalaşdırılır 

Bu gün Azərbaycan regionun ən böyük yenidənqurma və qayıdış proqramlarından birini həyata keçirir.

Oxu24.com  xəbər verir ki, bunu Ağdam, Füzuli və Xocavənd rayonlarında Prezidentin xüsusi nümayəndəsi Emin Hüseynov WUF13 çərçivəsində keçirilən “Böhrandan sonra bərpa və yenidənqurmanın mərkəzində mənzil məsələsi” adlı tədbirdəki çıxışında deyib.

Emin Hüseynov deyib ki, Ağdam, Füzuli və Xocavənd rayonlarında şəhər və kəndlər sıfırdan yenidən qurulur: "Bu proses uzunmüddətli davamlılıq, inklüzivlik və dayanıqlılıq prinsiplərinə əsaslanır. Yanaşmamız bir əsas prinsipə söykənir: mənzil ilk yerdə olmalıdır. Çünki mənzil insanlara ləyaqət, sabitlik və etibar hissini qaytarır.

Ailələr təhlükəsiz evlərə qayıtdıqda məktəblər yenidən açılır, yerli iqtisadiyyat canlanır, sosial əlaqələr bərpa olunur və icmalar gələcəyə inamını qazanır. Artıq xeyli sayda keçmiş məcburi köçkün yenidən qurulmuş yaşayış məntəqələrinə qayıdıb və yaxın illərdə daha çox insanın geri dönməsi gözlənilir. Yeni yaşayış massivləri, məktəblər, səhiyyə müəssisələri və ictimai xidmətlər normal həyatın bərpası istiqamətində fəaliyyətə başlayır. Eyni zamanda, yenidənqurma keçmişin zəifliklərini təkrarlamamalıdır. Biz daha yaxşı, daha ağıllı və daha dayanıqlı şəhər sistemləri qurmalıyıq. Məhz buna görə Azərbaycan yenidənqurma prosesinə müasir şəhərsalma, yaşıl enerji, rəqəmsal idarəetmə və dayanıqlı infrastruktur inteqrasiya edir”.

O əlavə edib ki, “Ağıllı şəhər” və “ağıllı kənd” konsepsiyaları vasitəsilə Ağdam, Füzuli və Xocavənd rayonlarında texnologiyaya əsaslanan və dayanıqlı icmalar formalaşdırılır. Artıq bir sıra kəndlər qabaqcıl nümunələr kimi çıxış edir.

Həmçinin bu layihələrin bərpa olunan enerji həllərini, yüksək sürətli rəqəmsal bağlantını, o cümlədən fiber-optik internet infrastrukturunu, müasir sosial infrastrukturu və ekoloji məsuliyyətli şəhər planlamasını özündə birləşdirdiyi qeyd olunub:

“Günəş enerjisi və milli elektrik şəbəkəsinə əsaslanan hibrid enerji sistemləri, həmçinin ikitərəfli elektrik sayğacları Azərbaycanda ilk dəfə tətbiq olunur. Biz həmçinin yüzlərlə fərdi qazanxana sistemini daha təhlükəsiz və enerji baxımından səmərəli mərkəzləşdirilmiş istilik sistemləri ilə əvəz edən innovativ həllər tətbiq edirik.

Sakinlər istiliyi müstəqil şəkildə tənzimləyə və yalnız faktiki istifadə etdikləri enerji üçün ödəniş edə bilirlər. Bu isə enerji itkisini və CO2 emissiyalarını əhəmiyyətli dərəcədə azaldır”.

Həmçinin oxuyun

Pensiya təyinatında qaydalar DƏYİŞDİ: Bu şəxslərin müavinəti belə hesablanacaq — YENİ AÇIQLAMA

Bu gündən başlayaraq 5 gün davam edəcək  — ƏHALİYƏ XƏBƏRDARLIQ

Bol yağışın dəhşətli səbəbi üzə çıxdı - İran görün nə edib... 

Zəlzələ OLDU