Ürəkgetmə beyin şişinin ilkin əlaməti ola bilər – Mütəxəssisdən XƏBƏRDARLIQ  

Cəmiyyətdə tez-tez rast gəlinən səhhət problemlərindən biri olan ürəkgetmə (bayılma) halları bir çox insan tərəfindən yanlış olaraq sırf kardioloji problem kimi qiymətləndirilir. Çox zaman vətəndaşlar ürəyi gedən şəxsi dərhal kardioloq müayinəsinə aparır və bu da əsl səbəbin tapılmasını gecikdirərək qiymətli zamanın itirilməsinə gətirib çıxarır. Halbuki, bu cür halların böyük əksəriyyəti məhz sinir sistemi və beyin fəaliyyəti ilə birbaşa bağlı olan nevroloji pozuntulardan qaynaqlanır. Qəfil baş verən ürəkgetmələr bəzən orqanizmdə gizlənən və həyati təhlükə yaradan ciddi xəstəliklərin ilk xəbərdarlıq siqnalı ola bilər. Xüsusilə də qəfil ortaya çıxan bayılmalar baş beyin şişləri kimi ağır patologiyaların ilkin simptomu kimi özünü göstərə bilir. Bu səbəbdən də ürəkgetmə zamanı vaxt itirmədən mütəxəssis həkimə müraciət etmək və dəqiq diaqnozun qoyulmasını təmin etmək vacibdir.

Oxu24.com xəbər verir ki, mövzu ilə bağlı həkim-nevroloq Yeganə Rəşidova xəbərdarlıq edərək vacib məqamlara diqqət çəkib.

Mütəxəssisin sözlərinə görə, insanlar arasında düzgün bilinen yanlışlardan biri ürəkgetmə zamanı xəstənin ilk olaraq ürək həkiminə aparılmasıdır:

"Düzdür, bəzi hallarda ritm pozğunluğu kimi kardioloji xəstəliklər ürəkgetməyə səbəb ola bilər. Lakin ürəkgetmə halları 90 faiz göstəricilərdə məhz nevroloji bir problemlə əlaqədar olur. Qəfil olan ürəkgetmələr ciddi bir xəstəliyin xəbərdaredicisi ola bilər. Belə ki, ürəkgetmə baş beyin şişlərinin ilkin əlaməti kimi meydana çıxa bilir”.

Həkim-nevroloq qeyd edib ki, bu cür hallarda mütləq şəkildə nevroloqa müraciət edilməlidir:

"Xəstənin yanında olan şəxslər tərəfindən düzgün məlumat verilməli, geniş anamnestik məlumatlar toplanmalıdır. Lazım gələrsə, analizlər, baş beyinin MRT müayinəsi və beyin damarlarının müayinəsi aparılmalı, xəstəyə dəqiq diaqnoz qoyulmalıdır. Nevroloq xəstədə ritm pozğunluğu aşkar edərsə, onu kardioloqa yönəldəcəkdir. Əsas məsələ ürəkgetmənin dəqiq səbəbini araşdırmaq və müalicəni düzgün aparmaqdır”.

Həmçinin oxuyun

Azərbaycanın tanınmış şairi VƏFAT ETDİ 

Bakı-Ankara münasibətləri niyə hədəfə çevrilib? — TƏHLİL

11 oktyabrda bizi nələr gözləyir?  — ULDUZ FALI

Ailələrə uşaq sayına görə pul veriləcək? – Azərbaycanda yeni mexanizm tətbiq oluna bilər