Dərinin qocalmasına təsir edən əsas amillər açıqlandı  

Dərinin qocalması təkcə yaşın artması ilə bağlı deyil. Bu prosesə genetik xüsusiyyətlərlə yanaşı, günəş şüaları, stress, yuxusuzluq və həyat tərzi də ciddi təsir göstərir.

Bu fikirləri dermatoloq Fərhad Qarayev Oxu24.com-a açıqlamasında bildirib.

Həkimin sözlərinə görə, dəridə qocalmanın ilk əlamətləri qırışların yaranması, dəri tonunun dəyişməsi, piqment ləkələrinin əmələ gəlməsi, dərialtı piy toxumasının azalması və dərinin sallanması ilə özünü göstərir.

"Dərinin qocalması zamanı elastiklik azalır, üz cizgilərində dəyişikliklər baş verir. Dəri əvvəlki dolğunluğunu itirir və sallanmalar yaranır. Tibbdə bu proses qravitasion dəyişikliklər adlandırılır", – deyə dermatoloq qeyd edib.

F.Qarayev bildirib ki, dərinin hansı yaşdan qocalmağa başlayacağı hər insanda fərqlidir və burada əsas rol genetik faktorlara məxsusdur.

"Genetik amil həlledici rol oynayır. Elə ailələr var ki, həmin nəsildə insanlar 30-35 yaşına qədər nə saçların ağarması, nə də qırışlarla qarşılaşırlar. Digər insanlarda isə bu proses daha erkən başlayır. Yəni hər kəs üçün eyni yaş həddi yoxdur", – deyə o vurğulayıb.

Mütəxəssis qeyd edib ki, genetikadan başqa, xarici mühit faktorları da dərinin qocalmasını sürətləndirə bilir.

Onun sözlərinə görə, uzun müddət günəş şüalarına məruz qalmaq, xroniki stress, düzgün olmayan qidalanma, ağır iş şəraiti və yuxu rejiminin pozulması dərinin daha tez qocalmasına səbəb olur.

"Günəş şüaları dərinin vaxtından əvvəl qocalmasının əsas səbəblərindən biridir. Məsələn, peşəsi ilə əlaqədar gün ərzində açıq havada çalışan insanlarda qocalma əlamətləri daha erkən meydana çıxa bilər. Həmçinin stress və yuxusuzluq da bu prosesi sürətləndirir", – deyə dermatoloq bildirib.

F.Qarayev əlavə edib ki, gecə yuxusu zamanı orqanizmdə sintez olunan melatonin hormonu hüceyrələrin bərpasında mühüm rol oynayır.

"İnsan kifayət qədər yatmadıqda həm orqanizmin, həm də dərinin bərpa prosesi zəifləyir. Bunun nəticəsində qocalma əlamətləri daha tez meydana çıxır. Dəri də digər orqanlar kimi müntəzəm bərpaya ehtiyac duyur", – deyə həkim qeyd edib.

Dermatoloq bildirib ki, qocalma prosesini tam dayandırmaq mümkün olmasa da, sağlam həyat tərzi, balanslı qidalanma, keyfiyyətli yuxu, günəşdən qorunma və düzgün dəriyə qulluq sayəsində onun sürətini əhəmiyyətli dərəcədə azaltmaq mümkündür.

Həmçinin oxuyun

Prezident həmin sərəncamı imzalayacağını AÇIQLADI

Prezident müjdəni verdi: Yeni iş yerləri yaradılacaq

Prezident mühüm məlumatları AÇIQLADI:Praktiki işlər başlanacaqdır — MÜSAHİBƏ

Bakıda yaşayanların diqqətinə!12 avqust 2026-cı il saat 08:00-dan...