Dermatoloqlardan göbələklə bağlı XƏBƏRDARLIQ

TİBB

548

07.07.2026, 14:46

Xəbərlərimizi Google-da izləyin

Yeniliklərdən dərhal xəbərdar olun

Dəri göbələyi (mikoz) ən geniş yayılmış infeksion xəstəliklərdən biridir. Bu problem bədənin müxtəlif nahiyələrində – ayaqlarda, əllərdə, qasıq nahiyəsində, dırnaqlarda və baş dərisində meydana gələ bilər. Göbələk infeksiyası vaxtında və düzgün müalicə edilmədikdə uzunmüddətli narahatlığa, təkrarlanan infeksiyalara və hətta ailə üzvlərinə yoluxmaya səbəb ola bilər.

Oxu24.com xəbər verir ki, dermatoloqlar bildirirlər ki, göbələk xəstələrinin etdiyi ən ciddi səhvlərdən biri müalicəni yarımçıq dayandırmaqdır. Bir çox pasiyent müalicəyə başladıqdan cəmi 2-3 həftə sonra dəri səthindəki qızartının, qaşınmanın və halqaşəkilli ləkələrin azalmasını görərək xəstəliyin tam sağaldığını düşünür. Nəticədə isə həkim məsləhəti olmadan istifadə etdiyi kremi və ya dərmanı dayandırır.Halbuki bu, ən böyük yanlışlardan biridir. Mütəxəssislərin sözlərinə görə, göbələk infeksiyasının xarici əlamətlərinin azalması o demək deyil ki, xəstəlik tamamilə sağalıb. Dərinin səthində qızartı və qaşınma aradan qalxsa da, göbələyi törədən mikroorqanizmlər dərinin dərin qatlarında hələ də yaşaya bilər. Müalicə vaxtından əvvəl dayandırıldıqda həmin göbələklər yenidən çoxalmağa başlayır və qısa müddət sonra xəstəlik əvvəlkindən daha güclü şəkildə geri qayıda bilir.Bəzi hallarda yarımçıq saxlanılan müalicə göbələyin istifadə olunan dərmanlara qarşı daha davamlı olmasına da səbəb ola bilər. Bu isə sonrakı müalicə prosesini daha uzun, çətin və bahalı edir.

Dermatoloqlar vurğulayırlar ki, göbələk infeksiyalarında müalicə yalnız simptomlar yox olana qədər deyil, həkimin müəyyən etdiyi müddət ərzində davam etdirilməlidir. Əksər hallarda kliniki sağalma əldə olunduqdan sonra da profilaktik məqsədlə müəyyən müddət müalicənin davam etdirilməsi tövsiyə olunur. Bunun məqsədi dəridə qalan son göbələk hüceyrələrinin də tam məhv edilməsidir.Müalicə dövründə şəxsi gigiyena qaydalarına riayət etmək də böyük əhəmiyyət daşıyır. Ayaqları və bədəni daim quru saxlamaq, corabları hər gün dəyişmək, ayaqqabıları dezinfeksiya etmək, dəsmal və digər şəxsi əşyaları başqaları ilə paylaşmamaq lazımdır. Əks halda infeksiyanın yenidən yoluxması və ya ailənin digər üzvlərinə keçməsi riski artır.

Həkimlər qeyd edirlər ki, xüsusilə şəkərli diabeti olan şəxslər, immun sistemi zəif olan insanlar və idman zalları, hovuzlar kimi ictimai məkanlardan tez-tez istifadə edənlər göbələk infeksiyalarına daha həssas olurlar. Bu səbəbdən ilk əlamətlər – qaşınma, qabıqlanma, qızartı və ya halqaşəkilli ləkələr müşahidə edilən kimi dermatoloqa müraciət etmək vacibdir.Mütəxəssislər sonda bir daha xəbərdarlıq edirlər ki, göbələk infeksiyasının uğurlu müalicəsinin əsas şərti dərmanların həkimin təyin etdiyi müddət ərzində fasiləsiz istifadəsidir. Özbaşına müalicəni dayandırmaq xəstəliyin təkrarlanmasına və daha ciddi problemlərin yaranmasına səbəb ola bilər. Buna görə də müalicə prosesində dermatoloqla daim əlaqədə olmaq və onun tövsiyələrinə tam əməl etmək tövsiyə olunur.

Nigar

Həmçinin oxuyun