Güclü tərləmə nə vaxt təhlükəlidir? Kardioloqdan vacib açıqlama

TİBB

03.07.2026, 13:48

Bəzi insanlar həddindən artıq tərləməni yalnız isti hava, fiziki yorğunluq və ya gündəlik stresslə əlaqələndirsələr də, mütəxəssislər bildirirlər ki, bu əlamət bəzən daha ciddi sağlamlıq problemlərinin xəbərçisi ola bilər. Xüsusilə səbəbsiz və davamlı tərləmə ürək-damar sistemi xəstəlikləri də daxil olmaqla müxtəlif patologiyalarla əlaqəli ola bilər.

Kardioloq-terapevt Aynur Məmmədova Oxu24.com saytına açıqlamasında bildirib ki, tərləmə insan orqanizminin təbii müdafiə mexanizmlərindən biridir və bədən temperaturunun tənzimlənməsində mühüm rol oynayır. Lakin bəzi hallarda həddindən artıq tərləmə müəyyən xəstəliklərin ilkin əlaməti kimi qiymətləndirilməlidir.

Mütəxəssis qeyd edir ki, tərləmə ürək-damar sistemi xəstəlikləri zamanı müşahidə oluna bilən əlamətlərdən biridir. Xüsusilə ürəyin fəaliyyətində yaranan problemlər, qan dövranının pozulması və ürək əzələsinin kifayət qədər oksigenlə təmin olunmaması bəzi insanlarda güclü tərləmə ilə müşayiət edilə bilər.Bununla yanaşı, tərləmənin yalnız ürək xəstəlikləri ilə əlaqələndirilməsi düzgün yanaşma deyil. Çünki sinir sistemi xəstəlikləri, qalxanabənzər vəzin funksional pozğunluqları, metabolik dəyişikliklər və hətta ağciyər xəstəlikləri də bu əlamətin yaranmasına səbəb ola bilər.

Həkimin sözlərinə görə, orqanizmin immun sisteminin zəifləməsi və müxtəlif infeksion proseslər zamanı da insanlarda həddindən artıq tərləmə müşahidə edilir. Bu, bədənin xəstəliklə mübarizə aparmasının təbii nəticəsi kimi ortaya çıxır.Xüsusilə gecə saatlarında baş verən və paltarın, yataq dəstinin islanmasına səbəb olan profuz tərləmələr diqqətlə araşdırılmalıdır. Belə hallarda ilk növbədə ağciyərlərin vəziyyətinin yoxlanılması tövsiyə olunur. Çünki bəzi ağciyər xəstəlikləri, xroniki infeksiyalar və digər ciddi patologiyalar gecə tərləmələri ilə özünü göstərə bilər.Gündəlik adi hərəkətlər zamanı, hətta insan tam sakit vəziyyətdə oturduğu halda belə güclü tərləmə baş verirsə və bu hal ürək nahiyəsində sıxılma, təzyiq və ya ağrı hissi ilə müşayiət olunursa, mütləq şəkildə kardioloqa müraciət edilməlidir.Belə simptomlar bəzi hallarda ürəyin işemik xəstəliklərinin, stenokardiyanın və ya digər ürək-damar problemlərinin ilkin əlamətləri ola bilər. Vaxtında aparılan müayinələr isə xəstəliyin erkən mərhələdə müəyyən olunmasına və ciddi fəsadların qarşısının alınmasına imkan verir.Xüsusilə nəfəs darlığı, tez yorulma, ürəkdöyünmə, başgicəllənmə və həddindən artıq tərləmə birlikdə müşahidə olunursa, bu əlamətlər diqqətdən kənarda saxlanılmamalıdır.Həkimlər insanlara öz orqanizmlərinin verdiyi siqnallara həssas yanaşmağı tövsiyə edirlər. Çünki bəzən adi görünən bir simptom gələcəkdə ciddi xəstəliklərin qarşısını almaq üçün mühüm xəbərdarlıq rolunu oynayır.

Kardioloq-terapevt Aynur Məmmədovanın sözlərinə görə, sağlam həyat tərzi, düzgün qidalanma, müntəzəm fiziki aktivlik və profilaktik tibbi müayinələr ürək-damar xəstəliklərinin erkən aşkarlanması və qarşısının alınmasında mühüm əhəmiyyət daşıyır.

Mütəxəssislər bildirirlər ki, davamlı və səbəbi bilinməyən tərləmə heç vaxt özbaşına qiymətləndirilməməli, xüsusilə digər narahatedici əlamətlərlə birlikdə müşahidə edilirsə, mütləq həkim müayinəsindən keçilməlidir. Erkən diaqnostika bir çox hallarda həm sağlamlığın, həm də həyatın qorunması baxımından həlledici rol oynayır.

Jalə

Həmçinin oxuyun