İlham Əliyevin "yaşıl enerji" və davamlı şəhər inkişafı təşəbbüsləri dünya miqyasında dəstək görür - RƏY

$İlham Əliyevin \"yaşıl enerji\" və davamlı şəhər inkişafı təşəbbüsləri dünya miqyasında dəstək görür - RƏY $

SİYASƏT

1018

24.05.2026, 09:03

WUF13-də qəbul edilən "Sədrin Xülasəsi" sənədində Azərbaycan Prezidentinin uzaqgörənliyinin vurğulanması qlobal problemlərin həll olunmasına verdiyi töhfələrdən irəli gəlir.

Bu sözləri "Report"a açıqlamasında Milli Məclisin deputatı Hikmət Babaoğlu deyib.

O bildirib ki, Azərbaycanda keçirilən Ümumdünya Şəhərsalma Forumunun 13-cü sessiyası (WUF13) tarixə çevrilib:

"Bu forumda həm WUF13-ün, həm də Azərbaycanın beynəlxalq əlaqələrinin yeni tarixi yazılmış oldu. Dünyanın ən böyük tədbirlərindən biri hesab olunan bu beynəlxalq tədbirə rekord sayda iştirakçı qatılmışdı. Elə baş tutan sessiyada, həm də dünyanın qlobal problemlərindən biri olan şəhərsalma və urbanizasiya problemlərinin həll edilməsi ilə bağlı da ilk dəfə bu səviyyədə ölkələr arasında əməkdaşlıq təşəbbüsləri nümayiş etdirildi, qarşılıqlı təcrübə mübadiləsi həyata keçirildi. Azərbaycanın bu forumda beynəlxalq təşkilatlara necə yüksək səviyyəli ev sahibliyi etməyi diqqət çəkmiş oldu. WUF13 sessiyasında bir sıra ilklər də baş verdi. Burada "Sədrin Xülasəsi" sənədi qəbul edildi. Bu sənədi qəbul edərkən dünyanın 70-dən çox ölkəsindən nazir və nazir müavinləri iştirak etdi. Qeyd edildi ki, 176 ölkədən gələn 57 mindən çox iştirakçının qatıldığı bu tədbir, WUF tarixində Ümumdünya Şəhərsalma Forumunun ən böyük sessiyası kimi yadda qaldı".

Deputat deyib ki, bu, ilk növbədə ev sahibi ölkənin və onun liderinin beynəlxalq münasibətlər sistemindəki nüfuzu ilə bağlıdır:

"Tədbir Birləşmiş Millətlər Təşkilatının Məskunlaşma Proqramı (UN-Habitat) təşkilatçılığı altında həyata keçirilsə də, tədbirin hansı səviyyədə baş tutması ev sahibliyi edən ölkənin dövlət başçısının digər ölkələrin dövlət başçıları ilə əlaqələri kontekstində ortaya çıxır. "Sədrin Xülasəsi" sənədində Azərbaycan Prezidentinin uzaqgörənliyinin və liderliyinin vurğulanması da bundan irəli gəlir. Azərbaycan BMT üzvü kimi bu təşkilatın dünyada qlobal problemlərin həll olunmasında daha səmərəli və daha funksional olması üçün vaxtaşırı təşəbbüslərlə çıxış edir".

Hikmət Babaoğlunun sözlərinə görə, Azərbaycan Prezidentinin BMT ilə bağlı səsləndirdiyi fikirləri BMT-Azərbaycan dialoqunu daha da dərinləşdirir və strateji edir:

"Çünki istənilən halda hər hansı bir beynəlxalq təşkilatın və ya dövlətin idarə olunması üçün ideyalar, təşəbbüslər və onların icra mexanizmi olmalıdır. Azərbaycan da hazırda məhz bu kontekstdə, real, rasional müstəvidə BMT ilə əməkdaşlıq edir. Bu, gələcəkdə BMT-Azərbaycan münasibətlərinin daha da dərinləşməsinə və şaxələnməsinə gətirib çıxaracaq. Azərbaycan bu tədbirlərə ev sahibliyi etməklə, əslində həm də Birləşmiş Millətlər Təşkilatının təşəbbüsü ilə keçirilən belə tədbirlərin yeni keyfiyyətini təyin edən bir ölkəyə çevrilir".

Həmçinin oxuyun