Yayda bu təhlükələrə DİQQƏT!— İnfeksionistdən AÇIQLAMA

TİBB

433

18.06.2026, 23:02

Hər il yay mövsümünün gəlişi, havaların kəskin isinməsi və insanların səyahət aktivliyinin artması özü ilə bərabər müəyyən sağlamlıq riskləri də gətirir. Müvafiq gigiyena qaydalarına tam riayət edilməməsi və temperatur dəyişikliyi bu aylarda infeksion xəstəliklərin sürətlə yayılmasına münbit şərait yaradır.

Mövzu ilə bağlı Oxu24.com-a həkim-infeksionist Ziba Hüseynova danışıb.

Həkim yay aylarında əhalinin ən çox qarşılaşdığı 6 əsas infeksiyanı və onlardan qorunma yollarını təfərrüatları ilə açıqlayıb.

Həkim-infeksionist Ziba Hüseynovanın sözlərinə görə, yay aylarında xəstəliklərin strukturunda ciddi dəyişikliklər baş verir və növbəti problemlər ön plana çıxır:

1.Bağırsaq İnfeksiyaları

Bu, yay mövsümünün ən geniş yayılmış və pik həddə çatan problemidir. İnfeksiya orqanizmə əsasən yaxşı yuyulmamış meyvə-tərəvəzlər, təmizliyindən əmin olunmayan çirkli sular və düzgün temperaturda saxlanılmayan qidalar vasitəsilə yoluxur.

Əlamətləri: İshal, qusma, yüksək qızdırma və kəskin ürəkbulanma.

2.Günvurma və İstivurma Halları

Dr. Ziba Hüseynova qeyd edir ki, bu hallar patoloji olaraq birbaşa infeksiya hesab edilməsə də, öz spesifik əlamətlərinə və kliniki gedişatına görə tez-tez digər kəskin infeksion xəstəliklərlə qarışdırılır.

3.Gənə və Həşərat Sancması ilə Ötürülən Xəstəliklər

Yayda təbiət qoynunda istirahət edənlərin sayı artır. Xüsusilə kənd təsərrüfatı sahələrində çalışanlar və meşəlik, otluq (piknik) ərazilərinə üz tutan şəxslər həşərat və gənə sancmalarına qarşı maksimum dərəcədə diqqətli olmalıdırlar.

4.Hepatit "A" (Sarılıq)

Xalq arasında "sarılıq" kimi tanınan bu virus xəstəliyi də fekal-oral yolla – yəni çirkli su və natəmiz qida vasitəsilə sürətlə yayılır.

Əlamətləri: Qızdırma, ümumi halsızlıq, dəridə və gözdə sarılıq, eləcə də digər hepatit simptomları.

5.Dəri İnfeksiyaları və Göbələk Xəstəlikləri

Kütləvi istifadə edilən hovuzlar, çimərliklər və yay mövsümünə xas olan isti-rütubətli hava mühiti bədəndə müxtəlif dəri infeksiyalarının, xüsusən də göbələk xəstəliklərinin yaranması və inkişafı üçün ideal şərait formalaşdırır.

6.Sidik Yolları İnfeksiyaları

İsti hava şəraitində orqanizmin həddindən artıq tərləməsi, gün ərzində kifayət qədər maye (su) qəbul edilməməsi, həmçinin durğun və natəmiz sularda çimmək birbaşa sidik yolları infeksiyalarına zəmin yaradır.

İnfeksiyalardan necə qorunmalı?

Doktor Ziba Hüseynova yay günlərini xəstəxana çarpayısında deyil, sağlam və gümrah keçirmək istəyən vətəndaşlara bir neçə qızıl qaydanı xatırladır:

“Əllərinizi gün ərzində mütəmadi olaraq sabunla yuyun.

Mənbəyi bilinməyən, çirkli və keyfiyyətsiz sulardan qətiyyən istifadə etməyin.

İsti havada tez xarab olan qidaların saxlanma şəraitinə və temperaturuna ciddi əməl edin.

Dənizə gedərkən müvafiq dövlət qurumları tərəfindən çimmək qadağan olunmuş ərazilərdən uzaq durun.

Gün ərzində mütləq şəkildə kifayət qədər və bol miqdarda təmiz su qəbul edin”.

Çimnaz Telmanqızı

Həmçinin oxuyun