Mirvari əməliyyatından sonra görmə zəifliyi və ağrılar nə ilə bağlı ola bilər? – Mütəxəssis açıqladı

TİBB

422

07.05.2026, 16:27

Katarakta (mirvari) əməliyyatı müasir oftalmologiyada ən çox icra olunan və ümumilikdə təhlükəsiz sayılan cərrahi müdaxilələrdən biridir. Lakin bəzi hallarda əməliyyatdan sonra xəstələrdə görmənin tam yaxşılaşmaması, göz daxilində ağrı və narahatlıq kimi şikayətlər müşahidə oluna bilər.

Oftalmoloq Ruslan Məmmədov Oxu24.com-a açıqlamasında bildirib ki, bu cür halların səbəbləri müxtəlif ola bilər və hər biri ciddi şəkildə qiymətləndirilməlidir.

Mütəxəssisin sözlərinə görə, əməliyyatdan sonra ilk diqqət yetirilməli məqam gözdaxili iltihabdır (postoperativ inflamasiya). Bu vəziyyət nadir hallarda müşahidə olunsa da, dünya praktikasında tamamilə istisna edilmir. Statistik olaraq, katarakta əməliyyatlarından sonra müəyyən faizdə gözdaxili iltihab yarana bilər və bu hal dərhal müdaxilə tələb edir. Belə vəziyyətdə xəstədə ağrı, qızartı, işığa həssaslıq və görmədə zəifləmə müşahidə oluna bilər.

Həkim vurğulayır ki, əməliyyatdan sonra gözə təzyiq etdikdə ağrı hiss olunması, xüsusilə də bu ağrının davamlı olması, normal hal hesab edilmir və mütləq təcili oftalmoloji müayinə tələb edir. Bu, həm iltihabi proses, həm də digər postoperativ fəsadların göstəricisi ola bilər.

Digər vacib məqamlardan biri isə görmənin zəif qalmasıdır. Ruslan Məmmədov qeyd edir ki, xəstələr bəzən əməliyyatdan sonra “linza dəyişdirildi, amma niyə yaxşı görmürəm?” kimi suallar verirlər. Lakin görmənin zəif olmasının səbəbi təkcə yerləşdirilən linza ilə bağlı olmur.

Belə hallarda torlu qişa (retina) və xüsusilə sarı nöqtə (makula) xəstəlikləri əsas səbəblərdən biri ola bilər. Əgər bu strukturlarda problem varsa, ən keyfiyyətli süni linza belə tam görmə təmin etməyə bilər. Buna görə də əməliyyatdan sonra görmə zəifliyi davam edirsə, mütləq göz dibi müayinəsi aparılmalıdır.

Oftalmoloq əlavə edir ki, bəzi hallarda əməliyyatdan sonra heç bir ağrı və iltihab olmadan da görmə istənilən səviyyədə olmaya bilər. Bu zaman səbəb refraksiya qüsurları ola bilər. Yəni xəstəyə yaxın və ya uzaq üçün eynək ehtiyacı yarana bilər. Bu, əməliyyatın uğursuz olması demək deyil, sadəcə görmənin tam optimallaşdırılması üçün əlavə korreksiya tələb oluna bilər.

Nadir hallarda isə əməliyyatdan sonra yaranan fəsadlar gecikmiş formada üzə çıxa bilər və bu da müntəzəm həkim nəzarətini vacib edir.

Sonda həkim xüsusi olaraq vurğulayır ki, katarakta əməliyyatından sonra aşağıdakı hallarda dərhal həkimə müraciət edilməlidir:

Göz daxilində ağrı və basqı hissi

Görmənin qəfil və ya davamlı zəifləməsi

Qızartı və işığa həssaslıq

Gözə toxunduqda ağrı

Ruslan Məmmədovun sözlərinə görə, vaxtında edilən müayinə və düzgün müalicə görmə funksiyasının qorunmasında həlledici rol oynayır.

Hazırladı: Turan Etibaroğlu

Həmçinin oxuyun