Atadan qalan avtomobil necə bölünür? – Vəkil açıqladı

HÜQUQ

724

22.07.2026, 17:28

Xəbərlərimizi Google-da izləyin

Yeniliklərdən dərhal xəbərdar olun

Valideynin vəfatından sonra onun adına qeydiyyatda olan avtomobilin hansı qaydada vərəsələr arasında bölünməsi və ən doğru hüquqi yolun necə olduğu vətəndaşların tez-tez qarşılaşdığı məsələlərdəndir.

Bu barədə Oxu24.com-a açıqlama verən vəkil Fərid Yaqublu bildirib ki, mərhumun adına olan avtomobil heç bir halda avtomatik olaraq həyat yoldaşının və ya övladlarının adına keçmir. Bunun üçün qanunvericiliyin müəyyən etdiyi vərəsəlik proseduru həyata keçirilməlidir.

Vəkilin sözlərinə görə, ilk növbədə notariat orqanında vərəsəlik işi açılmalı, mərhumun qanuni vərəsələri müəyyən edilməli və hər birinin miras payı rəsmiləşdirilməlidir. Yalnız bu prosedur başa çatdıqdan sonra avtomobil üzərində mülkiyyət hüququnun kimə məxsus olacağı müəyyən edilir.

Fərid Yaqublu qeyd edib ki, qanunvericiliyə əsasən mərhumun həyat yoldaşı və övladları birinci növbəli vərəsələr hesab olunurlar. Bu səbəbdən avtomobil üzərində onların hər birinin qanuni pay hüququ yaranır. Lakin vərəsələr öz aralarında razılığa gələ və pay bölgüsünü fərqli şəkildə həll edə bilərlər.

"Əgər ana öz miras payından övladının xeyrinə imtina etmək istəyirsə, bu tamamilə mümkündür. Bunun üçün notariat qaydasında müvafiq ərizə verilir və imtina rəsmiləşdirilir. Bu halda avtomobil üzərində mülkiyyət hüququ tam şəkildə digər vərəsənin adına keçirilə bilər", – deyə vəkil bildirib.

Onun sözlərinə görə, vərəsəlik hüququ haqqında şəhadətnamə alındıqdan sonra avtomobil Dövlət Yol Polisi orqanlarında yeni sahibin adına qeydiyyata alınmalıdır. Yalnız bundan sonra həmin şəxs avtomobili satmaq, bağışlamaq və ya digər hüquqi əməliyyatlar aparmaq hüququ əldə edir.

Vəkil vurğulayıb ki, bəzi hallarda vətəndaşlar avtomobili uzun illər mərhumun adına saxlayırlar. Bu isə gələcəkdə alqı-satqı, sığorta, qeydiyyat və digər hüquqi məsələlər zamanı ciddi çətinliklər yaradır.

"Vərəsəlik məsələləri vaxtında həll edilməlidir. Əks halda həm sənədləşmə prosesi uzanır, həm də ailə üzvləri arasında əlavə hüquqi mübahisələr yarana bilir. Ona görə də vətəndaşlara tövsiyəmiz odur ki, miras qalan əmlak, o cümlədən avtomobillə bağlı bütün prosedurları qanunvericiliyin tələblərinə uyğun şəkildə rəsmiləşdirsinlər", – deyə Fərid Yaqublu əlavə edib.

Vəkil hesab edir ki, mirasın bölüşdürülməsi zamanı qanuni prosedurlara əməl olunması həm vərəsələrin hüquqlarının qorunmasına, həm də gələcəkdə yarana biləcək mübahisələrin qarşısının alınmasına xidmət edir. Buna görə də hər hansı anlaşılmazlıq yarandıqda hüquqi məsləhət almaq və vərəsəlik prosedurunu rəsmi qaydada həyata keçirmək ən doğru addım hesab olunur.

Həmçinin oxuyun