Kirayədə yaşayanlara vacib XƏBƏR:Ev sahibi sizə görə cərimə OLUNACAQ

HÜQUQ

781

09.06.2026, 15:43

Kirayə müqaviləsi olmadan ev vermək hansı məsuliyyət yaradır? – Hüquqşünasdan açıqlama

Son illər mənzil kirayəsi bazarında ən çox rast gəlinən hallardan biri kirayə münasibətlərinin rəsmi müqavilə bağlanmadan həyata keçirilməsidir. Bir çox ev sahibləri kirayə müqaviləsinin bağlanmasını vacib hesab etməsələr də, bu, gələcəkdə həm hüquqi, həm də maliyyə problemlərinə səbəb ola bilər.

Oxu24.com-a açıqlamasında hüquqşünas Ziyafət Qarayeva bildirib ki, kirayə münasibətlərinin qanunvericiliyin tələblərinə uyğun rəsmiləşdirilməsi həm ev sahibinin, həm də kirayəçinin hüquqlarının qorunması baxımından mühüm əhəmiyyət daşıyır.

Onun sözlərinə görə, mənzilin kirayəyə verilməsi zamanı əldə olunan gəlirlər qanunvericiliklə müəyyən edilmiş qaydada bəyan edilməli və vergiyə cəlb olunmalıdır. Əgər şəxs kirayə müqaviləsi bağlamadan və əldə etdiyi gəlirləri gizlədərək mənzilini icarəyə verirsə, bu halda inzibati və maliyyə məsuliyyəti yarana bilər.

Hüquqşünas qeyd edib ki, vergi qanunvericiliyinin tələblərinin pozulması hallarında vətəndaşlara müvafiq maliyyə sanksiyaları tətbiq oluna bilər. Xüsusilə əldə olunan gəlirlərin bəyan edilməməsi və ya yanlış məlumatların təqdim olunması əlavə məsuliyyət yaradır.

"Kirayə münasibətlərinin müqavilə ilə rəsmiləşdirilməsi yalnız vergi öhdəliklərinin yerinə yetirilməsi baxımından deyil, eyni zamanda gələcək mübahisələrin qarşısının alınması üçün də vacibdir. Müqavilə olmadıqda kirayə haqqının ödənilməsi, mənzilə vurulan zərərin ödənilməsi, kirayəçinin çıxarılması və digər məsələlər üzrə hüquqların müdafiəsi daha çətin olur", – deyə hüquqşünas bildirib.

Ziyafət Qarayeva vurğulayıb ki, bəzi hallarda ev sahibləri kirayə gəlirlərini daha az göstərməyə və ya ümumiyyətlə bəyan etməməyə çalışırlar. Lakin aparılan yoxlamalar zamanı bu faktlar aşkar edilərsə, qanunvericilikdə nəzərdə tutulmuş maliyyə sanksiyaları tətbiq oluna bilər.

Onun sözlərinə görə, vətəndaşlar gələcək problemlərlə qarşılaşmamaq üçün kirayə münasibətlərini rəsmi qaydada rəsmiləşdirməli, müqavilə bağlamalı və qanunvericilikdən irəli gələn öhdəlikləri yerinə yetirməlidirlər.

"Kirayə müqaviləsi həm ev sahibinin, həm də kirayəçinin hüquqlarını qoruyan əsas sənəddir. Buna görə də vətəndaşlar bu məsələyə ciddi yanaşmalı və bütün əməliyyatları qanun çərçivəsində həyata keçirməlidirlər", – deyə hüquqşünas əlavə edib.

Mütəxəssis hesab edir ki, kirayə münasibətlərinin şəffaf və qanuni əsaslarla qurulması həm tərəflər arasında etibarlı münasibət yaradır, həm də gələcəkdə yarana biləcək hüquqi mübahisələrin qarşısını alır. Buna görə də ev sahiblərinə mənzillərini kirayəyə verərkən mütləq yazılı müqavilə bağlamaq və qanunvericiliyin tələblərinə əməl etmək tövsiyə olunur.

Hazırladı: Turan

Həmçinin oxuyun