85 İLLİK ÖMRÜN İŞIĞINDA: PROFESSOR HAFİZ PAŞAYEV HAQQINDA DÜŞÜNCƏLƏRİM  

Şəfibəyli Hüseyin

Bəzən insan həyatda elə adamlarla qarşılaşır ki, onlarla görüşdükdən sonra daxilində qəribə bir rahatlıq yaranır. Sanki uzun illərdir tanıdığın, hörmət etdiyin bir insanla söhbət etmisən. Hafiz Paşayev mənim yaddaşımda məhz belə qalan insanlardandır.

Onun adını illərlə eşitmişdim. Görkəmli alim, diplomat, ADA Universitetinin qurucusu kimi tanıyırdım. Ancaq etiraf edim ki, insanı yaxından tanımadan onun haqqında tam fikir formalaşdırmaq olmur.

Ötən il qızım Nəsrinlə birlikdə ADA Universitetində Hafiz müəllimlə görüşmək imkanımız oldu. Bu görüş mənim üçün sadəcə bir tanışlıq deyildi. O gün mən yalnız böyük vəzifələr daşımış bir dövlət xadimini deyil, həm də böyük ürəyə malik bir insanı tanıdım.

Nəsrinin həm memarlıq sahəsində təhsil aldığını, həm də Muğam müsabiqəsinin diplomantı olduğunu eşidəndə onun maraqla verdiyi suallar, səmimi münasibəti və xoş sözləri qızımın da, mənim də yaddaşımızda qaldı. O, gənclərin uğuruna sevinən, onların gələcəyini düşünən bir müəllim kimi danışırdı.

Məni ən çox təsirləndirən isə onun sadəliyi oldu. İllərlə Azərbaycanın adını dünyanın ən böyük siyasi mərkəzlərində təmsil etmiş bir insanın tələbələri ilə eyni masada əyləşməsi, onlarla birlikdə nahar etməsi, hər kəsə eyni diqqət göstərməsi mənə çox şey anlatdı.

Həmin gün mən Hafiz müəllimin böyüklüyünü vəzifəsində yox, sadəliyində gördüm.

Mən Cənubi Azərbaycanın ab-havasında böyümüş bir insanam. Hafiz müəllimin ailəsinin bağlı olduğu Sofyanın Əndəbil kəndinin ,Təbrizin adı çəkiləndə içimdə qəribə bir doğmalıq hissi oyanırdı. Bəzən insanları yaxınlaşdıran yalnız tanışlıq olmur. Eyni torpağın qoxusu, eyni yurdun xatirələri, eyni mənəvi dəyərlər də insanları bir-birinə bağlayır.

Bu gün Hafiz müəllimin 85 illik yubileyində mən ona yalnız görkəmli diplomat, alim və təhsil təşkilatçısı kimi baxmıram. Mən onu Azərbaycanı sevən, insanlara dəyər verən, sadəliyi ilə hörmət qazanan böyük bir ziyalı kimi görürəm.

Hafiz müəllim, Sizə möhkəm cansağlığı, uzun ömür və yeni uğurlar arzulayıram. Allah Sizə can sağlığı versin ki, yetişdirdiyiniz tələbələrin, xidmət etdiyiniz Azərbaycanın uğurlarını uzun illər görəsiniz.

Sizinlə olan qısa görüşümüz mənim yaddaşımda həmişə xoş bir xatirə kimi yaşayacaq.

Həmçinin oxuyun

Milli Məclis müəllimlərlə bağlı qərar qəbul edib

Avqust ayında qeyri-iş günü nəzərdə tutulmayıb

Prezidentin nazir müavini təyin etdiyi şəxs kimdir? - DOSYE  

Bu şəxslərə şad xəbər:10% məbləğ geri qaytarılacaq