Fitrəni bayramdan bir gün qabaq da vermək olar —  Fitrə ilə bağlı SUALLARA CAVAB 

Məlumdur ki, Ramazan ayının başa çatmasına sayılı günlər qalıb. Bayrama az qalmış fitrə zəkatının məbləği ilə bağlı tövsiyə olunan məbləğ də açıqlanıb. Qazılar Şurasının fətvasına əsasən, bu il adambaşına 10–15 manat məbləğində fitrə zəkatının verilməsi tövsiyə olunur.

Qeyd edək ki, fitrə zəkatı İslamda mühüm ibadətlərdən biri hesab olunur. Bu, Ramazan ayının sonunda verilməsi vacib olan sədəqə növüdür. Fitrə zəkatı oruc tutan şəxsin mənəvi paklanmasına xidmət edir və eyni zamanda bayram günlərində ehtiyac içində olan insanların sevincinə səbəb olur.

Fitrə zəkatı ilə bağlı maraqlı olan digər məqamlardan biri isə onun hansı hallarda, nə zaman və necə verilməsidir.

Fitrənin verilmə qaydaları barədə Oxu24.com-a danışan ilahiyyatçı Ağa Hacıbəyli fitrə sədəqəsinin iki böyük mahiyyəti ifadə etdiyini söyləyib:

“Birincisi, bu sədəqə fitrətin, yəni insanlığımzın sədəqəsi hesab olunur, mənəvi kimliyimizin ifadəsidir. Yəni tutduğumuz oruc səmada asılı vəziyyətdədir, onu Allahın dərgahına qaldıran isə verdiyimiz sədəqədir. Bu bir hədisdir və Peyğəmbərimiz (s.ə.s) söyləyib. Fitrə sədəqəsi tutduğumu orucu kamilləşdirir və onun haqq qatında yerini möhkəmləndirir. 

Həmçinin oxuyun

"Space" TV-də daha iki verilişin yayımı dayandırıldı 

Bu il keçid balları enəcək, yoxsa qalxacaq? – AÇIQLAMA  

Azərbaycanda ət BAHALAŞIR: İqtisadçıdan XƏBƏRDARLIQ  

Bakıda yaşayanlara vacib xəbər: Sabah saat 00:00-dan... 

Sədəqənin ikinci tərəfi isə, bayramda fəqirlərin, yəni kasıb və ehtiyacı olan şəxslərin sevincinə səbəb olmasıdır. Ona görə fitrə sədəqəsini çalışıb vermək lazımdır. Hədislərimizdə də buyrulub ki, əvvəllər arpadan, xurmadan, düyüdən bir nəfər üçün 3 kq civarında fitrə çıxarılarmış. Günümüzdə isə bunun məbləği 10-15 manat civarındadır”. 

İlahiyyatçı qeyd edib ki, fitrənin çıxarılma vaxtı bayram namazından öncədir:

“Dinimizə görə, fitrə bayram namazından öncə çıxarılmalıdır ki, yoxsul insanlar da bayramın feyzini, ləzzətini ala bilsinlər, yemək bişirib süfrələrinə qoysunlar.

Bu baxımdan fitrə sədəqəsini Ramazan bayramından öncə vermək lazımdır. Bayramdan sonraya qalarsa isə, məkruf, yəni bəyənilməz hesab olunur. Ona görə də fəqir insanları tapıb bayram namazından öncə fitrəni vermək lazımdır. Amma fitrəni bayramdan bir gün qabaq da vermək olar. Əgər verəcəyimiz insan çox uzaqdadırsa, öncədən verilməsi də mümkündür”. 

A.Hacıbəyli bildirib ki, dinimizə görə fitrə sədqəsini zəngin adamlar çıxarmalıdır:

“İslam dini 80 qram qızılı olan adamı zəngin hesab edir. Bir məqama da diqqət etmək lazımdır: Sədəqəni verəcəyimiz adama ancaq ələbaxımlılıq səviyyəsində fitrə verməməliyik, yəni imkanımız varsa, ona elə bir fitrə sədəqəsi verməliyik ki, o insanın yoxulluğuna son qoyulsun. Bir sözlə, limiti yaxşı mənada pozmaq olar. Minimum hədd adambaşına 10-15 manat qeyd olunsa da, yuxarı hədd müəyyən edilməyib. İnsan Allah qatında nə qədər istəsə fitrə verə bilər”.

Yeganə