Şərab ləkəsi tamamilə yox ola bilərmi? – Dermatoveneroloqdan müalicə ilə bağlı açıqlama  

Bəzi insanlar doğulduqları andan etibarən dərilərində, xüsusilə üz nahiyəsində qırmızı və ya tünd qırmızı rəngli ləkələrlə qarşılaşırlar. İlk baxışdan adi xal və ya dəri ləkəsi təsiri bağışlayan bu izlər əslində anadangəlmə damar anomaliyası ola bilər. Tibbdə “şərab ləkəsi” kimi tanınan bu vəziyyət dəridəki kiçik damarların inkişaf xüsusiyyətləri ilə əlaqədardır. Ləkə bəzən uşağın üzündə, boynunda və bədənin digər nahiyələrində görünür, zaman keçdikcə rəngi tündləşə və dəri səthində müəyyən dəyişikliklər yarana bilər.

Bəs şərab ləkəsi nədir, hansı əlamətlərlə özünü göstərir və müasir tibbin imkanları ilə onu tamamilə aradan qaldırmaq mümkündürmü? Mövzu ilə bağlı dermatoveneroloq Ceyhun Bədirov Oxu24.com-a açıqlamasında bildirib ki, şərab ləkəsi anadangəlmə damar qüsurudur. Bu vəziyyət dəridə qırmızı və ya tünd qırmızı rəngli ləkənin yaranması ilə xarakterizə olunur.

Onun sözlərinə görə, ləkə xarici görünüşünə görə sanki dərinin üzərinə şərab tökülmüş təsiri bağışladığından bu adla tanınır. Şərab ləkəsi, əsasən, dərinin səthinə yaxın yerləşən damarların genişlənməsi ilə əlaqədardır. Bu səbəbdən həmin nahiyədə rəng dəyişikliyi meydana gəlir və ləkə doğuşdan etibarən müşahidə oluna bilər.

Həkim qeyd edib ki, şərab ləkəsinin ən əsas əlaməti dəridə, xüsusilə üz nahiyəsində aydın görünən qırmızımtıl və ya tünd qırmızı rəngli izlərin olmasıdır. Ləkənin ölçüsü və rəng intensivliyi insandan-insana dəyişə bilər. Bəzi insanlarda kiçik bir sahəni əhatə etdiyi halda, digərlərində üzün daha geniş hissəsinə yayıla bilər. Həmçinin ləkənin rəngi zamanla daha tünd çalarlara keçə bilər.

Ceyhun Bədirovun sözlərinə görə, bu vəziyyət ilk növbədə estetik problem kimi diqqət çəkir. Xüsusilə üz nahiyəsində yerləşən ləkələr insanın xarici görünüşünə təsir göstərdiyindən psixoloji narahatlıq və özünəinamla bağlı çətinliklər də yarada bilər. Bəzi hallarda isə zaman keçdikcə həmin nahiyədə dərinin qalınlaşması, səthində nahamarlıq və qabarmalar müşahidə oluna bilər. Bu səbəbdən şərab ləkəsinə yalnız kosmetik problem kimi yanaşmaq düzgün deyil.

Mütəxəssis bildirib ki, şərab ləkəsinin müalicəsində lazer texnologiyalarından istifadə olunur. Onun sözlərinə görə, klinikada bu məqsədlə Candela şirkətinin Vbeam Perfecta lazer aparatından istifadə edilir. Bu texnologiya damar mənşəli dəri dəyişikliklərinin müalicəsində tətbiq olunan üsullardan biridir.

Həkim izah edib ki, lazer şüası dəridəki problemli damarları hədəf alır. Müalicə zamanı damar daxilindəki hemoqlobin lazer enerjisini udur və nəticədə damarların tədricən kiçilməsi, rənginin zəifləməsi baş verir. Bunun nəticəsində şərab ləkəsinin əvvəlki qırmızı və ya tünd rəngi getdikcə açılır, bəzi hallarda isə ləkə demək olar ki, görünməz hala gəlir.

Ceyhun Bədirov vurğulayıb ki, müalicə bir seansla yekunlaşmaya bilər. Şərab ləkəsinin ölçüsündən, rəngindən, yerləşdiyi nahiyədən və damarların xüsusiyyətlərindən asılı olaraq bir neçə seans tələb oluna bilər. Hər seansdan sonra ləkənin rəngində müəyyən dəyişiklik, yəni açılma və solğunlaşma müşahidə edilə bilər. Seansların sayı və aralarındakı müddət isə həkim müayinəsindən sonra müəyyənləşdirilir.

Dermatoveneroloq şərab ləkəsinin tamamilə yox olma ehtimalının da olduğunu bildirib. Bununla belə, müalicənin nəticəsi hər kəsdə eyni olmur. Bəzi pasiyentlərdə ləkə əhəmiyyətli dərəcədə açılaraq demək olar ki, tamamilə itə bilər, digərlərində isə yalnız rəngin nəzərəçarpacaq dərəcədə zəifləməsi mümkün olur. Ləkənin dərinliyi, ölçüsü, rəng intensivliyi, yerləşdiyi nahiyə və müalicəyə verdiyi reaksiya son nəticəyə təsir göstərən əsas amillərdəndir.

Qeyd edək ki, şərab ləkəsi anadangəlmə damar malformasiyası hesab olunur və öz-özünə tamamilə yox olması gözlənilmir. Erkən yaşlarda mütəxəssisə müraciət edilməsi müalicə imkanlarının qiymətləndirilməsi baxımından əhəmiyyətlidir. Xüsusilə üzün müəyyən nahiyələrində yerləşən geniş ləkələr olduqda dermatoloq müayinəsi ilə yanaşı, ehtiyac yaranarsa, digər mütəxəssislərin də rəyi alınmalıdır. Lazer müalicəsinin mümkün nəticələri, riskləri və seans sayı hər pasiyent üçün fərdi şəkildə müəyyən edilməlidir.

Beləliklə, şərab ləkəsi müasir lazer texnologiyaları vasitəsilə əhəmiyyətli dərəcədə azaldıla, bəzi hallarda isə tamamilə aradan qaldırıla bilər. Lakin uğurlu nəticə üçün düzgün diaqnoz, ləkənin xüsusiyyətlərinin qiymətləndirilməsi və fərdi müalicə planının hazırlanması vacibdir.

Nigar

Həmçinin oxuyun

Türkiyədən acı xəbər: Hərbçilər həlak oldu

Məşhur sənətçi uzun müddətdən sonra səhnəyə qayıdır -FOTOLAR

Prezidentin Antalya səfəri hansı siyasi mənanı daşıyır?-DEPUTATLA MÜZAKİRƏ

Bakıda avtobuslarda YENİLİK: Gedişhaqqı 13 noyabrdan...