Təzyiq dərmanını nə vaxt qəbul etmək lazımdır? – Kardioloqdan vacib açıqlama

TİBB

12.08.2026, 15:50

Pasiyentlərin həkim tərəfindən təyin olunan dərmanları düzgün və ardıcıl qəbul etməməsi ürək-damar xəstəliklərinin müalicəsində ciddi problemlərə səbəb ola bilər. Bəzi insanlar dərmanı yalnız özlərini pis hiss etdikdə və ya arterial təzyiqin yüksəldiyini düşündükdə qəbul etməyə başlayırlar. Halbuki bir çox xroniki xəstəlik zamanı dərman müalicəsinin əsas məqsədi yalnız yaranmış simptomu aradan qaldırmaq deyil, xəstəliyi nəzarətdə saxlamaq və gələcəkdə yarana biləcək ağırlaşmaların qarşısını almaqdır.

Kardioloq Aytən Yunusova Oxu24.com-a açıqlamasında bildirib ki, xüsusilə arterial təzyiqdən əziyyət çəkən pasiyentlərin dərman qəbuluna münasibəti bəzən yanlış olur. Həkimin sözlərinə görə, bəzi xəstələr təzyiq dərmanını yalnız təzyiq yüksəldikdə qəbul etməli olduqlarını düşünürlər. Bu yanaşma isə xəstəliyin düzgün idarə olunmasına mane olur.

Mütəxəssis qeyd edib ki, pasiyentin öz arterial təzyiqini mütəmadi şəkildə ölçməsi və göstəriciləri izləməsi mühüm əhəmiyyət daşıyır. İnsan yalnız baş ağrısı, halsızlıq, ürəkdöyünmə və ya digər narahatlıq yarandıqda təzyiqinin yüksəldiyini düşünməməlidir. Çünki arterial hipertenziya bir çox hallarda uzun müddət heç bir aydın simptom vermədən davam edə bilər. Bu səbəbdən xəstənin özünü yaxşı hiss etməsi heç də təzyiqinin normal olduğu anlamına gəlmir.

Aytən Yunusovanın sözlərinə görə, həkim tərəfindən müəyyən edilmiş müalicə sxeminə riayət etmək xüsusilə vacibdir. Pasiyent dərmanı müəyyən müddət qəbul edib daha sonra özbaşına dayandırdıqda və ya yalnız təzyiq yüksələndə dərman içdikdə müalicənin effektivliyi azalır. Belə hallarda arterial təzyiq yenidən yüksələ, ürək-damar sisteminə düşən yük arta və xəstəliyin nəzarətdən çıxması baş verə bilər.

Kardioloq vurğulayıb ki, təzyiq dərmanlarının davamlı qəbul edilməsinin əsas məqsədlərindən biri damarların və ürəyin uzunmüddətli qorunmasıdır. Xüsusilə ürək-damar sistemi ilə bağlı problemi olan, damarlarında daralma və ya digər risk faktorları müəyyən edilən xəstələr müalicəyə daha ciddi yanaşmalıdırlar. Dərmanların vaxtında qəbul edilməməsi və müalicənin yarımçıq saxlanılması gələcəkdə ağırlaşmaların yaranma ehtimalını artıra bilər.

Mütəxəssis pasiyentlərə dərmanları özbaşına artırmamağı, azaltmamağı və tamamilə dayandırmamağı da tövsiyə edib. Müalicə zamanı arterial təzyiqin göstəricilərində dəyişiklik müşahidə edilərsə, bunun səbəbi həkim tərəfindən qiymətləndirilməlidir. Bəzən dərmanın dozasının dəyişdirilməsi, başqa preparata keçilməsi və ya əlavə müayinələrin aparılması lazım gələ bilər. Lakin bu qərarı pasiyentin özü deyil, onun sağlamlıq vəziyyətini bilən həkim verməlidir.

Aytən Yunusova bildirib ki, xəstələrə dərman müalicəsinin əhəmiyyəti dəfələrlə izah edilsə də, bəzi pasiyentlər bu məsələyə kifayət qədər ciddi yanaşmırlar. Onlar dərmanı yalnız xəstəlik özünü göstərdikdə qəbul etməklə kifayətləndiklərini düşünürlər. Halbuki xroniki ürək-damar xəstəliklərinin əksəriyyətində müalicənin davamlılığı xüsusi əhəmiyyət daşıyır.

Kardioloq xüsusilə ürək-damar xəstəlikləri səbəbilə müalicə alan şəxslərin həkim nəzarətində olmasının vacibliyini diqqətə çatdırıb. Onun sözlərinə görə, pasiyent yalnız dərman qəbul etməklə kifayətlənməməli, eyni zamanda arterial təzyiqini izləməli, həkimin verdiyi tövsiyələrə əməl etməli və mütəmadi müayinələrdən keçməlidir.

Həkim sonda pasiyentlərə müraciət edərək bildirib ki, dərman müalicəsinə məsuliyyətsiz yanaşmaq olmaz. Təyin olunan preparatların vaxtında və düzgün qəbul edilməsi, təzyiqin mütəmadi ölçülməsi və hər hansı dəyişiklik zamanı həkimə məlumat verilməsi ürək-damar sağlamlığının qorunmasında mühüm rol oynayır. Özbaşına müalicə və dərmanların təsadüfi şəkildə qəbul edilməsi isə əksinə, ciddi fəsadlara yol aça bilər.

Həmçinin oxuyun