“Reseptsiz linza almaq gözünüzə baha başa gələ bilər” - Oftalmoloq  

Rəngli linzalar göz rəngimizi dəyişdirərək xarici görünüşümüzə fərqli ab-hava qatır. Bir qism insanlar daha çox estetik gözəllik xatirinə istifadə olunan linzaların gözə həddindən artıq zərərli olduğunu və gözün zəifləməsinə gətirib çıxardığını söyləsə də, bəzi insanlar bunun heç də zərərli olmadığını bildirirlər.

Qeyd edək ki, dünyada hər gün 3 nəfər linzadan düzgün istifadə etmədiyi üçün görmə qabiliyyətini itirir. Linzalarla bağlı problemlər onların keyfiyyətsiz və saxta variantlarının da bazarda yer alması ilə izah olunur. Bir sözlə, bu kiçik göz “aksesuarları” gözlərimiz üçün təhlükələr yarada bilər.

Oftalmoloq Emil Yusifov Oxu24.com-a açıqlamasında linzaların doğru istifadə edilmədiyi təqdirdə insanın görməsinə göstərəcək mənfi təsirlərdən söz açıb. 

Onun sözlərinə görə, rəngli kontak linzalarından istifadə edərkən məhsulun keyfiyyətindən əmin olmaq lazımdır: 

“Bəzən insanlar kontak linzalarla yatırlar. Bu, olduqca böyük təhlükələrə yol aça bilər. Gecə yatarkən linzalar mütləq gözdən çıxarılmalıdır. Bəzi firmalar məhsullarını satarkən gecə yatdıqda linzanı çıxarmağa hec bir ehtiyacın olmadığını söyləsələr də, buna aldanmaq lazım deyil. Əslində linzalar göz səthində nə qədər az qalsa, bir o qədər yaxşıdır”. 

Həkim qeyd edib ki, reseptsiz satılan rəngli kontakt linzalar hər kəsə uyğun deyil:

Həmçinin oxuyun

Pensiyalarla bağlı VACİB XƏBƏR: 8 yaşına çatmamış uşaq olduqda...

ABŞ–İran müharibəsi: Böyük oyunda Rusiyanın qazancı nədir? - POLİTOLOQ  AÇIQLADI

Türkiyədən Azərbaycana gələn məşhur general KİMDİR?

SON DƏQİQƏ!  Azər Əliyevə yüksək VƏZİFƏ VERİLDİ

“Həm nömrəli, həm də nömrəsiz rəngli kontakt linzalar oftalmoloq tərəfindən təyin olunmalıdır. Rəngli kontakt linzalar adi linzalardan daha qalın, daha sərt olur və daha az oksigen alır. Bu, infeksiya ehtimalını artırır. Əgər bakteriya və ya digər mikroorqanizmlər kontakt linzalarınızın altında qalarsa, onlar buynuz qişa yaralarına səbəb ola bilər.

İstər rəngli, istər də rəngsiz göz linzaları düzgün istifadə edilmədikdə gözlərə zərər verir. Ona görə də həkimlə məsləhətləşməmiş linza alıb istifadə etmək sonradan bəzi fəsadlara səbəb ola bilər”.

Həmsöhbətimiz linza istifadə edərkən yararlılıq müddətinə fikir verməyin də vacib olduğunu vurğulayıb:  

“Yararlılıq müddəti linza açılmayana qədər saxlanıla bilən müddətdir. İstifadə müddəti isə linza açıldıqdan sonra hesablanır. Linzaların yararlılıq müddəti 2-3 il olsa da, istifadə müddəti fərqli ola bilər. Misal üçün, 1 günlük, həftəlik, aylıq, 6 aylıq da linzalar olur. Belə linzalardan 1-3 il istifadə isə ciddi fəsadlarla nəticələnə bilər. Bütün bu göstəricilər linzanın qabında göstərilməlidir”.

Yeganə