Rövşən Muradov: Ankara sammiti mühüm siyasi siqnaldır

SİYASƏT

626

10.07.2026, 10:44

7–8 iyul 2026-cı ildə Ankarada keçirilən NATO Sammiti müasir təhlükəsizlik sistemində yeni prioritetlərin formalaşdığını göstərən mühüm siyasi hadisə kimi qiymətləndirilməlidir. Bu toplantı hərbi müdafiə, enerji təhlükəsizliyi, müdafiə sənayesi, texnoloji üstünlük və kommunikasiya xətlərinin qorunması kimi məsələləri vahid strateji çərçivədə gündəmə gətirdi.

Bu sözləri Oxu24.com-a Milli Məclisin deputatı Rövşən Muradov bildirib.

Deputatın sözlərinə görə, sammitin Türkiyədə keçirilməsi Azərbaycan üçün ayrıca əhəmiyyət daşıyır. Türkiyə NATO-nun cənub cinahında güclü hərbi-siyasi aktor kimi çıxış edir və eyni zamanda Qara dəniz, Cənubi Qafqaz, Yaxın Şərq və Mərkəzi Asiya istiqamətlərini birləşdirən mühüm geosiyasi mərkəz rolunu oynayır.

Rövşən Muradov vurğulayıb ki,Azərbaycan-Türkiyə müttəfiqliyi bu mənzərədə regional sabitliyin, təhlükəsizlik balansının və strateji bağlantıların əsas dayaqlarından biri kimi görünür.Ankara Sammiti göstərdi ki, bugünkü təhlükəsizlik anlayışı yalnız klassik hərbi güclə ölçülmür. Enerji marşrutlarının dayanıqlığı, nəqliyyat dəhlizlərinin işləkliyi, kibertəhlükəsizlik, süni intellekt, pilotsuz sistemlər və müdafiə sənayesinin çevikliyi dövlətlərin real güc göstəricilərinə çevrilib.Azərbaycan bu sahələrdə coğrafi mövqeyi, enerji potensialı və nəqliyyat imkanları ilə beynəlxalq təhlükəsizlik mühitinə praktiki dəyər qatan ölkədir.Azərbaycanın NATO ilə münasibətləri müstəqil xarici siyasət xəttinə uyğun şəkildə inkişaf edir. Bu əməkdaşlıq siyasi dialoq, müdafiə təhsili, hərbi uyğunlaşma, minatəmizləmə, enerji təhlükəsizliyi və humanitar təhlükəsizlik istiqamətlərini əhatə edir. Azərbaycan heç bir güc mərkəzinin təsir orbitində hərəkət etmir və öz milli maraqlarına əsaslanan balanslı diplomatiya yürüdür.

Rövşən Muradov qeyd edib ki, sammitdən çıxan əsas nəticələrdən biri Cənubi Qafqazda sülhün artıq daha geniş beynəlxalq təhlükəsizlik gündəliyi ilə bağlı olmasıdır. Regionda sabitlik Orta Dəhlizin güclənməsi, enerji xətlərinin qorunması, Avropa ilə Asiya arasında alternativ bağlantıların inkişafı və Xəzər hövzəsinin strateji əhəmiyyətinin artması deməkdir. Bu baxımdan Azərbaycanın sülh gündəliyi regional çərçivəni aşan geosiyasi məzmun daşıyır.Azərbaycanın beynəlxalq mövqeyi regionda yaratdığı sabitlik, tərəfdaşlarda formalaşdırdığı etimad və təhlükəsizlik gündəliyinə verdiyi real töhfə ilə qiymətləndirilir.Ölkəmizin NATO ilə münasibətləri ardıcıl siyasi dialoq, qarşılıqlı etimad, müdafiə sahəsində əməkdaşlıq, enerji təhlükəsizliyi və regional sabitliyə verilən töhfələr üzərində formalaşıb.

Deputat əlavə edib ki, bu baxımdan ölkəmizin geosiyasi çəkisi iştirak formatından daha geniş strateji parametrlərlə müəyyən olunur. Əsas meyar Azərbaycanın regional proseslərə təsir imkanları, tərəfdaşlar qarşısında formalaşdırdığı etimad kapitalı və beynəlxalq təhlükəsizlik arxitekturasına verdiyi real töhfədir.Bu mənada Ankara NATO Sammiti Azərbaycan üçün mühüm siyasi siqnal verdi. Gələcəyin güclü dövləti yalnız hərbi imkanları ilə seçilmir. Strateji ağıl, diplomatik çeviklik, enerji təhlükəsizliyində rol, nəqliyyat-kommunikasiya imkanları və sabitlik yaradan siyasət də dövlətin beynəlxalq mövqeyini müəyyənləşdirir. Azərbaycan bu parametrlər üzrə Cənubi Qafqazın yeni reallığını formalaşdıran əsas siyasi mərkəzlərdən biridir.

Turan

Həmçinin oxuyun