İsmayıllı rayonunda keçirilən toy mərasimində kütləvi dava düşüb, bıçaqlanma hadisəsi baş verib. 

Oxu24.com -un  xəbərinə görə, İsmayıllı şəhəri Ağasəf Aslanov küçəsi, dalan 1, ev  2 ünvanında yaşayan 1961-ci il təvəllüdlü Nəriman Səfəralıyev övladı, 1993-cü il təvəllüdlü Abuzər Tahirli üçün "Gülüstan" şadlıq sarayında toy mərasimi təşkil edib. 
Mərasim zamanı qonaqlar arasında dava düşüb.

Toydan sonra onların davası mərasim sahibinin evində davam edib. Onları sakitləşdirmək istəyən bəy Abuzər Tahirli və onun qardaşı, 1993-cü il təvəllüdlü İlkin Tahirli toy mərasiminə dəvət olunmayan kənar şəxs, rayon sakini 1996-ci il təvəllüdlü Hafiz Ağayev tərəfindən bıçaqlanıb.

Övladlarının bıçaqlandığını görən bəyin atası Nəriman Səfəralıyev ürək tutması səbəbindən dünyasını dəyişib.
Xəsarət alan qardaşlar isə təcili olaraq İsmayıllı rayon Mərkəzi Xəstəxanasına aparılıb. Hadisəni törədən Hafiz Ağayev qaçaraq gizlənib. 

Hadisə şahidlərinin sözlərinə görə, Hafiz Ağayev toya dəvət edilməyən başqa iki dostu ilə birgə mərasimə gələrək dava salıblar.  
Bıçaqlanma faktı ilə bağlı hadisə şahidlərinin izahatları alınıb, rayon polis şöbəsində cinayət işi başlanılıb. 
Hadisəni törədən şəxsin saxlanılması istiqamətində polis əməkdaşları tərəfindən zəruri əməliyyat-istintaq tədbirləri davam etdirilir. 

Şahnəzər Bəşirov,
APA TV