Taksilərdə siqaret qadağası: Məsuliyyət kimin üzərinə düşür?

HÜQUQ

392

21.07.2026, 11:31

Xəbərlərimizi Google-da izləyin

Yeniliklərdən dərhal xəbərdar olun

Azərbaycan qanunvericiliyinə görə, taksi minik avtomobillərində tütün məmulatlarından istifadə etmək qəti şəkildə qadağandır. “Tütün məmulatlarının istifadəsinin məhdudlaşdırılması haqqında” Qanunun tələblərinə əsaslanan bu qadağa həm sürücülərə, həm də sərnişinlərə şamil edilir. Qaydanın əsas məqsədi vətəndaşların passiv siqaret tüstüsünün zərərli təsirindən qorunması və ictimai nəqliyyatda sağlam mühitin yaradılmasıdır. Lakin buna baxmayaraq, son vaxtlar taksilərdə siqaret çəkilməsi ilə bağlı sərnişin narazılıqları səngimir. Mövzu ilə əlaqədar nəqliyyat eksperti Adil Nəbiyev Oxu24.com saytına açıqlama verib.

Ekspert bildirib ki, məsələyə təkcə hüquqi müstəvidə deyil, həm də xidmət keyfiyyəti və peşə etikası baxımından yanaşmaq lazımdır:

“Qanunvericilik bu məsələdə hər iki tərəfin qarşılıqlı məsuliyyət daşıdığını açıq şəkildə müəyyənləşdirib. Sürücü xidmət göstərdiyi müddətdə avtomobilin salonunu təmiz və tüstüsüz saxlamalı, sərnişinin də siqaret çəkməsinə imkan verməməlidir. Eyni zamanda, sərnişin də bu hüquqi öhdəliyə hörmətlə yanaşmalıdır”.

Onun sözlərinə görə, taksi ictimai xidmət növüdür və hər bir sərnişin avtomobilə əyləşərkən təmiz hava və sağlam mühit gözləyir. Hətta sürücü sifarişdən əvvəl siqaret çəkmiş olsa belə, salonun tərkibinə hopan qoxu uzun müddət qalır və adi havalandırma ilə tam aradan qalxmır. Bu isə xüsusilə uşaqlar, hamilə qadınlar, yaşlı insanlar, allergiyası olan şəxslər və tənəffüs sistemi xəstəliklərindən əziyyət çəkən sərnişinlər üçün daha böyük risk yaradır.

Adil Nəbiyev qeyd edib ki, passiv siqaret tüstüsünün sağlamlığa mənfi təsiri Ümumdünya Səhiyyə Təşkilatı tərəfindən dəfələrlə təsdiqlənib. Buna görə də peşəkar taksi sürücüsü yalnız avtomobildə siqaret çəkməməli deyil, həm də salonun havasını daim təmiz saxlamalı, mütəmadi havalandırma aparmalı və avtomobilin gigiyenasına xüsusi diqqət yetirməlidir:

“Beynəlxalq təcrübədə də bu məsələyə çox ciddi yanaşılır. Bir çox ölkələrdə taksilərdə siqaret çəkmək qadağandır və qaydanı pozanlar inzibati məsuliyyətə cəlb olunurlar

Taksi şirkətləri də daxili qaydalarında sürücülərə avtomobildə siqaret çəkməyi qadağan edirlər, çünki bu, xidmət keyfiyyətinə mənfi təsir göstərir və müştəri məmnuniyyətini azaldır”.

Ekspert bir çox platformalarda sərnişinlərin avtomobildə siqaret qoxusuna görə sürücüyə aşağı reytinq verdiklərini vurğulayıb ki, bu da sürücünün gələcək sifarişlərinə mənfi təsir göstərir:

“Sərnişin sürücünün siqaret çəkdiyini və ya buna icazə verdiyini müşahidə edərsə, ilk növbədə sürücüyə bunun qadağan olduğunu xatırlada bilər. Problem aradan qaldırılmazsa, tətbiq vasitəsilə şikayət bildirmək və zərurət yarandıqda aidiyyəti dövlət qurumlarına məlumat vermək mümkündür”.

Sonda o əlavə edib ki, bu cür müraciətlər həm sərnişin hüquqlarının qorunmasına, həm də xidmət keyfiyyətinin yüksəldilməsinə xidmət edir. Nəticə etibarilə, taksidə siqaret çəkmək şəxsi seçim deyil, qanunla tənzimlənən və ictimai sağlamlığın qorunmasına yönəlmiş tələbdir.

Çimnaz Telmanqızı

Həmçinin oxuyun