Evdən işləmək artıq qanunidir – Hüquqlarınız nələrdir?

HÜQUQ

479

08.07.2026, 12:12

Son illərdə informasiya texnologiyalarının inkişafı və əmək bazarında baş verən dəyişikliklər nəticəsində məsafədən işləmə modeli geniş yayılıb. Bir çox vətəndaşı maraqlandıran suallardan biri də budur: Azərbaycanda evdən işləmək qanunvericiliklə mümkündürmü?

Oxu24.com-un məlumatına əsasən, hüquqşünasların sözlərinə görə, bu suala cavab bəlidir. Çünki Əmək Məcəlləsinə edilən son dəyişikliklər nəticəsində məsafədən işləmə anlayışı qanunvericilikdə öz əksini tapıb və bu iş formasının tətbiqinə hüquqi əsas yaradılıb.

Mütəxəssislər bildirirlər ki, qanunvericiliyə əsasən, əmək funksiyalarının müəssisədən kənarda, elektron və telekommunikasiya vasitələrinin köməyi ilə yerinə yetirilməsi məsafədən iş hesab olunur. Başqa sözlə, işçi öz vəzifələrini ofisə gəlmədən, evdən və ya başqa bir məkandan internet, kompüter və digər rabitə vasitələri vasitəsilə icra edə bilər.Bu iş forması xüsusilə proqramçılar, mühasiblər, hüquqşünaslar, jurnalistlər, dizaynerlər, tərcüməçilər, müəllimlər, operatorlar və fəaliyyətini elektron mühitdə həyata keçirə bilən digər peşə sahibləri üçün geniş imkanlar yaradır.

Hüquqşünaslar qeyd edirlər ki, məsafədən işləyən əməkdaşın hüquqları ofisdə çalışan işçilərin hüquqlarından fərqlənmir. Belə işçilərlə də əmək müqaviləsi bağlanılır, onların əmək stajı hesablanır, məzuniyyət hüququ qorunur, sosial sığorta haqları ödənilir və digər əmək təminatları tam şəkildə qüvvədə qalır.Eyni zamanda işəgötürən və işçi arasında məsafədən işləmə qaydaları əvvəlcədən razılaşdırılmalıdır. İş vaxtı, görüləcək işin həcmi, hesabatlılıq, rabitə vasitələri, elektron sənəd dövriyyəsi və digər məsələlər əmək müqaviləsində və ya əlavə razılaşmada əks etdirilə bilər.

Mütəxəssislər vurğulayırlar ki, məsafədən işləmə işçinin istirahət hüququnun pozulması demək deyil. İşəgötürən əmək qanunvericiliyində nəzərdə tutulmuş iş vaxtına və istirahət müddətlərinə əməl etməlidir. İşçinin evdən işləməsi onun fasiləsiz şəkildə 24 saat işləməsi anlamına gəlmir.Bundan başqa, məsafədən işləmə zamanı əmək təhlükəsizliyi, şəxsi məlumatların qorunması və xidməti məlumatların məxfiliyi ilə bağlı tələblərə də riayət olunmalıdır. Elektron sənədlərlə işləyən əməkdaşlar informasiya təhlükəsizliyi qaydalarına əməl etməli, işəgötürən isə bu sahədə zəruri texniki və təşkilati tədbirləri görməlidir.

Hüquqşünasların fikrincə, məsafədən işləmə həm işçi, həm də işəgötürən üçün müəyyən üstünlüklər yaradır. İşçi yol və nəqliyyat xərclərinə qənaət edir, vaxt itkisi azalır və daha rahat iş şəraitində fəaliyyət göstərir. İşəgötürən isə ofis xərclərini azaltmaq və əmək məhsuldarlığını artırmaq imkanı əldə edir.Əmək münasibətləri rəsmiləşdirilmədən evdən işləmək gələcəkdə hüquqi problemlər yarada bilər. Buna görə də məsafədən işləyən hər bir şəxs əmək müqaviləsinin düzgün bağlandığından və hüquqlarının qanunla qorunduğundan əmin olmalıdır.

Beləliklə, Əmək Məcəlləsinə edilən dəyişikliklər nəticəsində Azərbaycanda məsafədən işləmə artıq qanunvericiliklə tanınan və tətbiq olunan əmək münasibətləri formalarından biridir. Bu model həm müasir əmək bazarının tələblərinə cavab verir, həm də işçilərə daha çevik və rahat iş imkanları yaradır.

Jalə

Həmçinin oxuyun