Ermənistanda revanşistlər hərəkətə keçdi - Nə baş verir?

DÜNYA

481

15.05.2026, 14:58

Ermənistanda iyunun 7-nə təyin edilmiş parlament seçkiləri yaxınlaşdıqca, bölgədə geosiyasi gərginliyin yeni bir mərhələyə qədəm qoyacağı ilə bağlı proqnozlar daha kəskin xarakter alır. Ekspert dairələri xəbərdarlıq edir ki, Moskvayönümlü qüvvələrin əsas məqsədi seçki bülletenləri ilə deyil, seçkidən sonrakı dövrdə yaradılacaq süni xaos vasitəsilə hakimiyyət dəyişikliyinə nail olmaqdır. Kremlin bu strategiyası Ermənistanı müstəqil xarici siyasət kursundan tamamilə uzaqlaşdıraraq, onu yenidən Rusiyanın hərbi-siyasi forpostuna çevirmək planına xidmət edir. Bu planın ən təhlükəli tərəfi isə bölgədə "üçüncü Qarabağ müharibəsi" qorxusunu manipulyasiya edərək, erməni cəmiyyətini "təhlükəsizlik müqabilində suverenlikdən imtina" seçimi qarşısında qoymaqdır. Baxmayaraq ki, Qarabağ artıq tamamilə Azərbaycanın nəzarətindədir və erməni əhalisi bölgəni tərk edib, Rusiyanın hələ də bu "dondurulmuş iddiaları" yenidən qızışdırmaq üçün hibrid metodlardan istifadə edə biləcəyi ehtimalı müzakirə olunur. Əsas ideoloji xətt isə dəyişməz qalır: Moskva erməni xalqına "biz olmasaq, varlığınız təhlükədədir" mesajını aşılayaraq, onları müstəmləkə təfəkküründə saxlamağa çalışır. iyunun 7-si Ermənistan üçün sadəcə bir səsvermə günü deyil, həm də müstəqil dövlətçiliklə xarici vassallıq arasında seçim nöqtəsi olacaq.

Oxu24.com xəbər verir ki,məsələ ilə bağlı NOCOMMENT.az-a danışan siyasi şərhçi Zeynal Turan qeyd edib ki, Kremlin seçkilərdən sonrakı ssenarisi birbaşa regional sülhün qarşısını almağa və bölgədə yeni münaqişə ocaqları yaratmağa hesablanıb: "Rusiyanın Ermənistandakı 'beşinci sütunu' seçki nəticələrini tanımamaq və küçə iğtişaşları vasitəsilə konstitusion quruluşu sarsıtmaq tapşırığı alıb. Onların ritorikasında 'Qarabağın itirilməsi' mövzusu hələ də manipulyasiya vasitəsidir. Moskva düşünür ki, Ermənistanda rəhbərliyə öz adamını gətirməklə Azərbaycanla imzalanacaq sülh müqaviləsini sabotaj edə bilər. Əslində, Ermənistandakı radikal qüvvələrin təbliğ etdiyi 'intiqam' və ya 'üçüncü müharibə' ideyası erməni xalqının yox, məhz Rusiyanın maraqlarına xidmət edir ki, bölgədəki hərbi mövcudluğunu əbədiləşdirsin".

Onun sözlərinə görə, Ermənistanda seçki sonrası gözlənilən gərginlik dalğası birbaşa Rusiyanın təcrid olunmuş vəziyyətdən çıxış yolu axtarması ilə bağlıdır: "Ruben Babayanın da vurğuladığı kimi, Rusiyanın bölgədəki varlığı müharibə, yoxluğu isə sülh deməkdir. Əgər iyunun 7-dən sonra İrəvanda Kremlə sadiq bir rəhbərlik formalaşarsa, biz sərhəddə yeni təxribatların və süni şəkildə qızışdırılan gərginliyin şahidi ola bilərik. Çünki Rusiyaya Ermənistan və Azərbaycan arasında davamlı sülh yox, idarə olunan münaqişə lazımdır ki, hər iki tərəfə 'vasitəçi' və 'hakim' kimi təsir göstərə bilsin. Erməni seçicisi anlamalıdır ki, revanşizm xülyasına qapılmaq onları yenidən kiminsə müstəmləkəsinə çevirəcək və ölkəni qanlı bir bataqlığa sürükləyəcək. Bu seçkilər Ermənistanın bir dövlət kimi 'olum, ya ölüm' imtahanıdır".

Həmçinin oxuyun