Seyran Ohanyandan Azərbaycanı hədələyən SENSASİYALI çıxış: MÜHARİBƏ OLACAQ?

"Ermənistan" parlament fraksiyasının lideri və keçmiş müdafiə naziri Seyran Ohanyan İkinci Dünya müharibəsinin bitməsinin ildönümü ilə bağlı keçirilən tədbirdə çıxış edərkən Azərbaycanı növbəti dəfə müharibə ilə hədələyib. O, "Ağır itkilərə baxmayaraq, erməni xalqı ayağa qalxa və irəliləməyə davam edə bilər",- deyərək revanşist mesajlar verib. Ermənistan daxilində keçmiş hərbi-siyasi elitanın seçki ərəfəsində bu cür aktivləşməsi və bölgədə sülh prosesini hədəf alması ciddi suallar doğurur.

Məsələ ilə bağlı Oxu24.com-a açıqlama verən politoloq Elşad Həsənov bildirib ki, Ermənistanda parlament seçkilərinə az vaxt qalmış revanşist qüvvələr, xüsusilə xaricdən maliyyələşən və dəstək alan qruplar yenidən aktivləşiblər.

Ekspert qeyd edib ki, həmin qüvvələr öz ritorikalarında müharibənin qaçılmaz olduğunu, Qarabağ məsələsini yenidən qaldıracaqlarını və ora qayıdacaqlarını iddia edirlər.

Politoloq vurğulayıb ki, bütün bu cəhdlərə baxmayaraq, Ermənistan əhalisinin böyük əksəriyyəti Baş nazir Nikol Paşinyanın apardığı siyasi xətti dəstəkləyir:

"Heç bir ana, heç bir qadın istəməz ki, yaxını müharibədə həlak olsun. Necə ki, bunu həmin Seyran Ohanyanın, Köçəryanın və Sarkisyanın dövründə erməni xalqı acı şəkildə gördü”.

Elşad Həsənovun sözlərinə görə, Paşinyan hakimiyyəti dövründə bu məsələlər müəyyən mənada qaydasına qoyulub və hazırkı rəhbərlik qonşularla sülh tərəfdarıdır. Revanşist qüvvələrin isə əsas məqsədi köhnə hərbçiləri yenidən hakimiyyətə gətirməkdir. Müsahib əlavə edib ki, bu prosesə Rusiyanın müəyyən siyasi dairələri ciddi dəstək göstərir və bu seçkilər Moskvanın Cənubi Qafqazda "sonuncu döyüşü" hesab oluna bilər.

Ekspert hesab edir ki, revanşistlər iyunun 7-də keçiriləcək seçkilərdə məğlubiyyətə uğrayacaqlar:

“Bu qüvvələrin arxasında əhali yoxdur və onların səs potensialı 10-12 faizdən artıq deyil. Avropa İttifaqı və Amerikanın Ermənistana göstərdiyi böyük dəstək nəticəsində yeni iş yerlərinin açılması və həyat səviyyəsinin yüksəlməsi əhalinin seçiminə birbaşa təsir edir.Paşinyan ermənilərin indiyə qədər yaşadığı miflərə son qoyaraq "real Ermənistan" qurmağa çalışır”.

Sonda politoloq bildirib ki, keçmiş hərbi-siyasi elitanın qarşıdurma yaratmaq cəhdləri nəticəsiz qalacaq. Mövcud reallıqlar Ermənistanda bu cür revanşist qüvvələr üçün siyasi yerin qalmadığını bir daha təsdiqləyir.

Çimnaz Telmanqızı

Həmçinin oxuyun

Əməkhaqqı 7 %-dən çox artıb

Bankdan kredit ala bilməyənlər üçün yeni imkan – Yeni qanun nə vəd edir?  

Milli Məclis qərar qəbul etdi

Azərbaycanda 4 günlük iş həftəsi başlayır?