Koreya Mərkəzi Xəbər Agentliyinin (KCNA) verdiyi xəbərə görə, Pxenyanda Şimali Koreya lideri Kim Çen Inın iştirakı ilə cəbhə bölgəsindəki bölmələrə yeni ballistik raketlər üçün 250 buraxılış qurğusunun təhvil verilməsi mərasimi keçirilib.

Oxu24.com xəbər verir  ki, qurğulardan hansı raketlərin buraxılacağı dəqiqləşdirilməyib.

Mərasimdən əvvəl Kim Çen In “KXDR silahlı qüvvələrinin yeni əsas hücum silahı kimi istifadəyə verilən” buraxılış qurğularına baxış keçirib və sonra onların sərhəd qoşunlarına təhvil verilməsi barədə göstəriş verib.

Kim Çen In yeni texnologiyanı “milli suverenliyi qorumaq və sülhü təmin etmək üçün qüdrətli qılınc kimi gücünü nümayiş etdirəcək KXDR-in milli nüfuzunu kəskin şəkildə artıraraq, KXDR adına və milli bayrağına böyük canlılıq aşılamaq üçün daha bir addım” adlandırıb. 

Koreya İşçi Partiyasının (WPK) Mərkəzi Komitəsinin katibi Ço Çun Ryonun dediyi kimi, yeni silah Kim Çen In tərəfindən şəxsən hazırlanıb.

İlin əvvəlindən Şimali Koreya bir sıra ballistik raket sınaqları keçirib. Onlardan bəzilərinə, məsələn, aprel ayında hipersonik sürüşmə döyüş başlığına malik bərk yanacaqla işləyən Hwasongpo-16B ballistik raketinin buraxılışına Kim Çen In rəhbərlik edirdi. İyulun əvvəlində Şimali Koreyanın Raket Elmləri üzrə Baş İdarəsi yeni “Hwasong-11da-4.5” taktiki ballistik raketini uğurla sınaqdan keçirib. Yeni raket 4,5 ton ağırlığında ultra böyük döyüş başlığına malikdir.

Nigar