EKSPERT: “Ələtdə yaradılacaq logistika mərkəzi Azərbaycanın rəqabət üstünlüyünü artıracaq”  

Azərbaycan və Özbəkistan arasında birgə logistika mərkəzinin yaradılması, ölkəmizin beynəlxalq nəqliyyat qovşağı statusunu daha da möhkəmləndirəcək. Bu layihə prioritet məkan olaraq Bakı Beynəlxalq Dəniz Ticarət Limanının infrastrukturu və respublikanın dəmir yolu şəbəkəsi ilə inteqrasiya olunmuş ərazidə nəzərdən keçirilir. Yeni mərkəz Mərkəzi Asiya, Cənubi Qafqaz və Avropanı birləşdirən qlobal marşrutların səmərəliliyini artırmağa xidmət edəcək. Müştərək platforma regional ticarət dövriyyəsinin genişlənməsinə və investisiya axınına əlavə təkan verəcək. Logistika sahəsindəki bu strateji addım Azərbaycanın qeyri-neft sektorunun inkişafında mühüm rol oynayacaq.

Mövzu ilə bağlı Oxu24.com-un suallarını iqtisad üzrə fəlsəfə doktoru, İqtisadi Resursların Öyrənilməsi Mərkəzinin sədri Ruslan Atakişiyev cavablandırıb.

R.Atakişiyev bildirib ki, Azərbaycan Orta Dəhliz üzərində yerləşən mühüm tranzit ölkə olduğundan bu gün həm Çin və Avropa, həm də Şimal və Cənub arasında əsas mövqedə dayanır:

“Xüsusilə, Çindən gələn məhsulların Avropaya və əks istiqamətə daşınmasında ölkəmizin rolu böyük əhəmiyyət kəsb edir. Bu baxımdan, Mərkəzi Asiya ölkələri, o cümlədən Özbəkistan öz məhsullarını Azərbaycan üzərindən qərb bazarlarına çıxarmaq imkanı əldə edirlər və hazırda da çıxarırlar. Ona görə də onların çoxu məhsulların daha asan, operativ hərəkəti və anbarlarda yerləşdirilməsi üçün özlərinin logistika mərkəzlərini formalaşdırmağa çalışırlar. Biz bənzər əməkdaşlığı Qazaxıstanla da müşahidə edirik”.

İqtisadçı qeyd edib ki, Ələt Azad İqtisadi Zonasında Özbəkistan və Azərbaycan arasında belə bir logistika mərkəzinin qurulması olduqca əhəmiyyətlidir:

“Bildiyimiz kimi, həmin bölgə xüsusi gömrük və vergi zonasıdır, orada müəyyən azadolmalar mövcuddur. Azərbaycan iqtisadiyyatı üçün əsas töhfə ondan ibarətdir ki, tranzit ölkə kimi buradan keçən məhsullara xidmət göstərilməsi və daşıma prosesi yerli şirkətlərin iştirakını genişləndirəcək. Bu isə dolayısı yolla ölkə büdcəsinə gələn gəlirlərə müsbət təsir göstərəcəkdir”.

Yekunda R.Atakişiyev əlavə edib ki, ən başlıca əhəmiyyət isə ondan ibarətdir ki, Orta Dəhlizdən nə qədər çox ölkə və xüsusilə Azərbaycanın bu mövqeyindən istifadə edərsə, ölkəmizin Orta Dəhlizdəki yeri və önəmi daha da artacaq. Bu da dünyada mövcud olan digər paralel dəhlizlərlə rəqabətdə Azərbaycanın üstünlük əldə etməsinə köməklik göstərəcəkdir.

Çimnaz Telmanqızı

Həmçinin oxuyun

TƏCİLİ!Həmin şəxs tutularaq Azərbaycana gətirilir

XƏBƏRDARLIQ: yağış yağacaq, şimşək çaxacaq 

Artan pensiyalarla bağlı AÇIQLAMA

Bu rayonlardan Bakıya gələnlərə pis xəbər — Qadağa qoyula bilər