Azərbaycan beynəlxalq nəqliyyat siyasətində artıq söz sahibidir"—Leypsiq Sammitindən MÜHÜM MESAJ  

 Almaniyanın Leypsiq şəhərində Azərbaycanın sədrliyi ilə keçirilən Beynəlxalq Nəqliyyat Forumunun (BNF) Sammiti çərçivəsində qlobal nəqliyyat sistemlərinin gələcəyinə dair mühüm müzakirələr aparılır. Ölkəmizin 2026-cı il üzrə bu nüfuzlu quruma rəhbərlik etməsi, Azərbaycanın beynəlxalq logistika xəritəsindəki strateji mövqeyini daha da gücləndirir.

Mövzu ilə bağlı Oxu24.com-a açıqlama verən nəqliyyat eksperti Eldəniz Cəfərov bildirib ki, bu sədrlik Azərbaycanın beynəlxalq nəqliyyat sistemində artan rolunun bariz göstəricisidir. Ekspertin sözlərinə görə, bu, sadəcə bir protokol qərarı deyil, Azərbaycanın illərdir apardığı nəqliyyat siyasətinin beynəlxalq səviyyədə qəbul edilməsidir.

"Azərbaycan artıq bir beynəlxalq “hab’dır"

Eldəniz Cəfərov vurğulayıb ki, bu gün dünya nəqliyyatında əsas diqqət təhlükəsizlik, dayanıqlıq və sürətli marşrutlara yönəlib:

"Beynəlxalq daşıma şirkətlərinin və təşkilatların nəzəri Azərbaycandadır. Ölkəmizə artıq bir beynəlxalq “hab” kimi baxırlar. Xüsusilə geosiyasi dəyişikliklər fonunda Orta Dəhlizin əhəmiyyəti ciddi şəkildə artıb və Azərbaycan bu dəhlizin ən əsas bəndlərindən biridir. Ölkəmizin coğrafi mövqeyi ilə yanaşı, liman, dəmir yolu və avtomobil infrastrukturu layihələrinə yatırdığı investisiyalar bu yolun strateji əhəmiyyətini daha da artırıb”.

Ekspert qeyd edib ki, beynəlxalq uğurlar daxili nəqliyyat sistemindəki sürətli modernləşmə ilə tamamlanır. Belə ki, qısa müddət ərzində ölkənin bir çox şəhər və rayonlarında yeni dəmir yolu xətləri çəkilib, müasir qatarlar istifadəyə verilib.

Paytaxt nəqliyyatındakı yeniliklərə toxunan E.Cəfərov deyib: 

“Bakıda ictimai nəqliyyatın ekoloji təmiz vasitələrlə idarə olunması, xüsusən də elektrobusların gətirilməsi mühüm addımdır. Eyni zamanda, taksi xidmətində aparılan islahatlar nəticəsində istismar olunan avtomobillər demək olar ki, tamamilə yenilənib”.

Yekun olaraq ekspert bildirib ki, Leypsiq Sammitindəki sədrlik Azərbaycana qlobal nəqliyyat gündəliyini formalaşdırmaq imkanı verir:

"Bu o deməkdir ki, Azərbaycan artıq yalnız tranzit xidməti göstərən ölkə deyil, həm də beynəlxalq nəqliyyat siyasətinin müzakirəsində söz sahibi olan əsas tərəf kimi çıxış edir".

Çimnaz Telmanqızı

Həmçinin oxuyun

SON DƏQİQƏ!SOCAR-da işləyənlərə mühüm xəbər:kütləvi ixtisarlarla bağlı...

Güzəştli mənzilləri satışa çıxır  — Ev almaq istəyənlərə ŞAD XƏBƏR

Pensiyalarla bağlı RƏSMİ AÇIQLAMA 

Nazirlər Kabineti yeni qərar verib