Prezidentin Fərmanı Bakıda nəyi dəyişəcək? — Vacib məqamlar AÇIQLANDI

CƏMİYYƏT

7992

11.05.2026, 23:14

Metro, avtobus və taksi vahid sistemdə: Bakı nəqliyyatında yeni dövr başlayır

Xəbər verdiyimiz kimi, Prezidentin fərmanına əsasən, "BakuBus" MMC və "Bakı Taksi Xidməti" MMC ləğv edilərək "Bakı Metropoliteni" Qapalı Səhmdar Cəmiyyətinə (QSC) birləşdirilib. Bununla da "Bakı Metropoliteni" QSC hər iki qurumun hüquqi varisi hesab olunur və onların bütün hüquq, öhdəlik və əmlakları metropolitenə keçir.

Yeni qərara əsasən:

•Metro, avtobus və taksi xidmətləri vahid mərkəzdən koordinasiya olunacaq.

* Cəmiyyətin fəaliyyətinə nəzarət üçün 5 üzvdən ibarət Müşahidə Şurası və 5 üzvdən ibarət İdarə Heyəti yaradılır.

* Gediş haqqının ödənilməsi və xidmətlərin təşkili üzrə vahid rəqəmsal həllərin tətbiqi nəzərdə tutulur.

Bu birləşmə (“Bakı Metropoliteni”, “BakuBus” və “Bakı Taksi Xidməti”) şəhər nəqliyyat sistemində hansı struktur dəyişikliyini yaradacaq?

Mövzu ilə bağlı Oxu24.com-a açıqlama verən nəqliyyat eksperti İlqar Hüseynov bu islahatın əhəmiyyətini yüksək qiymətləndirərək bildirib:

"Ümumiyyətlə, dünyada müxtəlif ölkələrdə çox yaxşı praktika var. Onlardan biri ictimai nəqliyyat sektorunun bir-birinə çox ciddi şəkildə inteqrasiya etməsidir. Məsələn, metro, metrobus, tramvay, eyni zamanda taksi xidmətlərini həyata keçirən xüsusi marşrutlar, xüsusi taksi duracaqlarının, taksi dayanacaqlarının yerləşdirilməsi. Və bütün bunlar bir-birinə inteqrasiya etdikdə, nəticə etibarilə ümumi nəqliyyat, ictimai nəqliyyat sisteminin, sərnişindaşımanın kifayət qədər sadələşdirilməsi, rahatlaşması və əlçatanlığı baş verir”.

Ekspert qeyd edib ki, bu sistemin ən uğurlu nümunələri Avropada tətbiq olunmaqdadır:

"Məsələn, Berlin şəhərində metropoliten sistemi, ictimai avtobuslar, tramvaylar bir-birinə çox ciddi şəkildə inteqrasiya olunub və həm sürətli sərnişindaşıma, həm də keyfiyyətli sərnişindaşıma sistemini qurulub. Bu baxımdan düşünürəm ki, bu dəyişikliklər ölkədə ictimai nəqliyyat sisteminin inkişafına və vətəndaşların rahatlığına, əlçatanlığına xidmət göstərə bilər”.

İlqar Hüseynov paytaxtın əsas problemi olan tıxaclara da toxunaraq, bu addımın vətəndaşları ictimai nəqliyyata yönləndirmək üçün həlledici olduğunu vurğulayıb:

"Amma bununla yanaşı, bizim ən dəhşətli problemimiz məhz tıxacların olmasıdır. Biz vətəndaşlarımızı şəxsi nəqliyyat vasitələrindən istifadənin azaldılmasına və təşviq olunaraq ictimai nəqliyyat sisteminə istifadəsinə keçid etməyə nail olmasaq, təbii ki, biz ciddi irəliləyişlərə, ciddi nəticələrə bu istiqamətdə gətirib çıxara bilməyəcəyik”,-deyə ekspert vurğulayıb.

Qeyd edək ki, bu birləşmə sərnişinlər üçün vahid ödəniş sistemi, daha koordinasiyalı marşrut xətləri və metro stansiyalarına çıxışın daha asan olması deməkdir.

Çimnaz Telmanqızı

Həmçinin oxuyun