Qonşularımız 1 qayadan milyonlar qazanır, bizdə müalicəvi - isti bulaq 48 ildir havayı axır   

Bu gün Türkiyegazetesi.com saytı səhifəsində bir xəbər  paylaşıb.

 Xəbərdə deyilir ki, Giresun şəhər mərkəzinin yaxınlığındakı Sıvacı kəndinin Taşhan bölgəsində yerləşən, tonlarla ağırlığında olan iki nəhəng qaya dik bir yamacda fizika qanunlarına meydan oxuyaraq diqqəti cəlb edir. Yerlilər ona "Gəlin qayası" deyir.  Qayalar haqqında  əfsanələri  onsuzda əraziyə  ziyarətçiləri cəlb edirdi . Hətta yerli camaat  danışır ki,  qədim zamanlarda çox gözəl bir  qız istəmədiyi biri ilə evləndirilməyə məcbur  edilir. Böyüklərinə etiraz edə bilməyən  qız toy günü at belində oğlan evinə aparılarkən dua edir ki, daşa dönsün, amma o evdə gəlin olmasın. Deyilənə görə  Allah onu eşidib və arzusunu  həyata keçirib. Qız elə burdan keçərkən daşa dönüb və əbədi burda qalıb” .

Təbii ki bu insanların  rəvayətidir . Amma Giresun Vilayət Xüsusi İdarəsinin səyləri sayəsində bölgənin rəsmi turizm bölgəsinə çevrildiyini vali (bizdə icra başçısı anlamını daşıyır- Ə.R) Muxtar Koç deyir. O, bildirib ki, bölgəyə onsuz da ziyarət edilirdi:”Amma indi rəsmi turizm bölgəsinə çevrilir. Vilayət Xüsusi İdarəsi bunu edir. Əvvəlcə baxış balkonu tikiləcək. Abadlıq işləri ilə yanaşı, sosial obyektlər də olacaq. Bu yerin çox gözəl görünüşü olacaq. İllərdir insanlar burada şəkil çəkdirmək üçün dayanırlar. Giresuna gələn və bu yoldan keçən demək olar ki, hər kəsin burada şəkli var”. 

Yadıma illər əvvəl doğma yurdum Ağdamda  qarşılaşdığım bir mənzərə düşdü.

 Deməli, 1978-80-ci illərdə Ağdamın Mirəşelli kəndinin şimal hissəsində  bir vaxtlar neft axtarırmışlar. O səbəbdən də dərin quyular qazılırmış. Həmin qazılan quyulardan birindən yüksək temperaturlu su çıxır.

Bax, Ağdamda qarşılaşdığım o suyu od kimi bulaq idi. Bulağın suyu o qədər istiydi ki, barmaqlarımı 1 saniyə suda saxlaya bilmədim. El arasında "Qaynar bulaq", “İsti su ” adı ilə məşhurdu. Kənd camaatının dediyinə görə, tərkibi mineral maddələrlə zəngindi, ona görə də, oynaq və dəri xəstəliklərinin müalicəsində əsl loğmandır.

Qohumlarımın çoxu həmin kənddə yaşadığına görə, onlar da bu bulağa bir möcüzə, bir Allah vergisi kimi baxırlar. Deyirlər ki, heyif ki, belə bir sərvət havayıca axıb gedir, qədr- qiyməti bilinmir. Burda bir müalicəvi mərkəz tikilsəydi, bəlkə də yüzlərlə, minlərlə insan bu yerlərə axın edərdi, xəstəliklərdən qurtulardı. Yerli əhali deyir ki, su ilə bərabər bulağın ətrafındakı palçığın da müalicəvi əhəmiyyəti var. Qaşınan, qızartılı və ya səpgili dəri 3 gün həmin palçıqla masaj olunduqdan sonra tamamilə sağalır.

Həmçinin oxuyun

TƏCİLİ! Bu qurumda həbslər BAŞLADI

Azərbaycanda qar yağacaq     —   XƏBƏRDARLIQ

DSMF ödənişlərlə bağlı AÇIQLAMA YAYDI

“Qarabağ”ın haqqı yeyildi, yoxsa hakim düzgün qərar verdi? – Azərbaycan futbolunda QALMAQAL  

Baxmayaraq ki, bulağın ətrafı zibilxanadır, amma İlin bütün fəsillərində bura çoxlu insan müalicəvi sudan şəfa tapmaq üçün gəlir.Biz bulağa yaxınlaşanda təxminən 10-15 nəfərin “İsti su ”yun göl olan hissəsində çimdiklərini gördük. Necə də deyərlər noyabrın  o soyuq, o küləkli havasında..!

Məlumatlara görə, Azərbaycanda 1000-dən artıq soyuq və termal mineral bulaq aşkar edilib. Bu bulaqlar əsasında respublikada bir sıra sanatoriyalar (İstisu, Qalaaltı, Şıxburnu, Suraxanı və s.) və mineral su zavodları (İstisu, Sirab, Badamlı, Vayxır və s.) tikilib. 1978-ci ildən bu təbii sərvətimiz  boş yerə axıb gedir. Bu bulağın suyundan səhhətində problem olan vətəndaşlarımız üçün istifadə edilə, burada bir  sanatoriya tikilə bilərdi.

 Əntiqə Rəşid