Ürək xəstələri necə yatmalıdır? – Kardioloq cavab verdi

TİBB

145

24.07.2026, 11:57

Cəmiyyətdə uzun illərdir dolaşan fikirlərdən biri də ürək xəstələrinin sol tərəfə uzanmasının sağlamlıq üçün təhlükəli olması ilə bağlıdır. Bir çox insan ürəyin bədənin sol tərəfində yerləşdiyini əsas gətirərək hesab edir ki, bu vəziyyətdə yatmaq ürəyə əlavə təzyiq göstərir və ürək xəstələri üçün risk yaradır. Mütəxəssislər isə bildirirlər ki, bu fikir elmi cəhətdən təsdiqini tapmayıb.

Mövzu ilə bağlı Oxu24.com-a açıqlama verən kardioloq Üzeyir Rəhimov bildirib ki, bu günə qədər aparılan tibbi araşdırmalar ürək xəstələrinin sol tərəfə yatmasının zərərli olduğunu göstərmir. Onun sözlərinə görə, insanların yatarkən seçdiyi bədən mövqeyi əksər hallarda şəxsi rahatlıq hissindən asılıdır və ürək xəstələri də özlərini hansı vəziyyətdə rahat hiss edirlərsə, həmin formada yata bilərlər.

Kardioloqun sözlərinə görə, aparılmış elmi tədqiqatlar göstərir ki, ürək xəstələri üçün ən rahat yuxu mövqelərindən biri sağ və ya sol böyrü üstə yatmaqdır. Bu vəziyyət xüsusilə arxası üstə yatmaqla müqayisədə daha üstün hesab olunur.

Üzeyir Rəhimov qeyd edib ki, arxası üstə uzanan insanlarda son illərdə geniş yayılan yuxu apnoesi problemi daha çox müşahidə edilir. Yuxu apnoesi yuxu zamanı nəfəsin qısa müddətə dayanması ilə xarakterizə olunur və əksər hallarda güclü xoruldama ilə müşayiət edilir.

Həkimin sözlərinə görə, yuxu apnoesi sadəcə yuxu keyfiyyətini pozan problem deyil. Bu vəziyyət arterial təzyiqin yüksəlməsinə, ürək ritm pozğunluqlarına, ürək çatışmazlığının ağırlaşmasına, infarkt və insult riskinin artmasına səbəb ola bilən ciddi xəstəliklərdən biridir.

Kardioloq bildirib ki, sağ və ya sol böyrü üstə yatdıqda tənəffüs yollarının bağlanma ehtimalı azalır və buna görə də yuxu apnoesi epizodları daha az müşahidə olunur. Bu isə ürəyin gecə saatlarında daha rahat işləməsinə şərait yaradır.

Üzeyir Rəhimov onu da vurğulayıb ki, bəzi ağır ürək çatışmazlığı olan xəstələrdə müəyyən narahatlıq hissi yarana bilər. Lakin bu da təhlükəli vəziyyət deyil. Araşdırmalar göstərib ki, ürəyi böyümüş və ya ürək çatışmazlığı olan xəstələr özlərini narahat hiss etdikdə yuxu zamanı şüursuz şəkildə bədən mövqelərini dəyişirlər.

Onun sözlərinə görə, insan orqanizmi bu baxımdan özünü qoruma mexanizminə malikdir. Əgər hər hansı vəziyyətdə ürəyin fəaliyyəti üçün narahatlıq yaranırsa, xəstə yuxuda belə fərqinə varmadan daha rahat mövqeyə çevrilir. Bu səbəbdən sol tərəfdə yatmağın ürəyə zərər verməsi ilə bağlı fikirlər elmi əsaslara söykənmir.

Kardioloq bildirib ki, ürəyin solda yerləşməsi insanların sol tərəfə yatmasının təhlükəli olması anlamına gəlmir. Bu barədə yayılan fikirlər daha çox uzun illərdir formalaşmış yanlış təsəvvürlərdən qaynaqlanır.

Üzeyir Rəhimov qeyd edib ki, ürək xəstələri üçün əsas məsələ hansı tərəfə yatmaq deyil, keyfiyyətli və fasiləsiz yuxunun təmin olunmasıdır. Çünki kifayət qədər yuxu almamaq, yuxu apnoesi, gecə tez-tez oyanmaq və xroniki yuxusuzluq ürək-damar sistemi üçün ciddi risk faktorları hesab olunur.

Mütəxəssis ürək xəstələrinə gecə saatlarında ağır yeməklərdən uzaq durmağı, artıq çəkini nəzarətdə saxlamağı, xoruldama və yuxuda nəfəs dayanması müşahidə edilərsə mütləq həkimə müraciət etməyi tövsiyə edib.

Kardioloq sonda bir daha vurğulayıb ki, “ürək xəstələri sol tərəfə yata bilməz” fikri tibbi baxımdan təsdiqlənməyib. Onun sözlərinə görə, insanlar özlərini hansı vəziyyətdə daha rahat hiss edirlərsə, həmin mövqedə yata bilərlər. Əgər hər hansı narahatlıq yaranarsa, orqanizm özü daha rahat vəziyyətə keçəcək və bu, təbii fizioloji proses hesab olunur. Buna görə də yalnız ürəyin solda yerləşməsini əsas gətirərək sol böyrü üstə yatmaqdan imtina etməyə ehtiyac yoxdur.

Həmçinin oxuyun