Göz zəifliyi uşaqlara keçə bilərmi? – Oftalmoloq açıqladı

Görmə problemləri və göz zəifliyi son illərdə həm böyüklər, həm də uşaqlar arasında daha çox rast gəlinən sağlamlıq problemlərindən biridir. 

Mövzu ilə bağlı oftalmoloq Benjamin Kərimov Oxu24.com-a açıqlama verərək valideynləri narahat edən əsas məqamlara aydınlıq gətirib.

Mütəxəssisin sözlərinə görə, göz zəifliyi bir çox hallarda irsi xarakter daşıya bilər və həm anadan, həm də atadan uşaqlara ötürülmə ehtimalı mövcuddur. Həkim bildirir ki, valideynlərdə görmə zəifliyi – yəni miyopiya və ya hipermetropiya kimi refraksiya qüsurları varsa, bu hal uşaqlarda da yaranma riskini əhəmiyyətli dərəcədə artırır.Xüsusilə “plus” və “minus” tipli görmə qüsurları erkən yaşlarda özünü göstərə bilir. Buna görə də uşaqların vaxtında oftalmoloji müayinədən keçirilməsi son dərəcə vacibdir. Onun sözlərinə görə, ideal halda uşaqlar ən gec 3 yaşından etibarən göz həkimi tərəfindən yoxlanılmalıdır.

Oftalmoloq vurğulayır ki, bir çox hallarda uşaqlar özləri görmə zəifliyini ifadə edə bilmirlər və valideynlər də bunu vaxtında hiss etmirlər. Nəticədə isə müalicə gecikdirilir və bu, ciddi fəsadlara gətirib çıxara bilər.Müalicə olunmayan görmə zəifliyi zamanla ambliopiya, yəni “tənbəl göz” probleminə səbəb ola bilər. Bu halda uşağın bir və ya hər iki gözündə görmə tam formalaşmır və görmə qabiliyyəti lazımi səviyyəyə çatmır. Erkən müdaxilə edilmədikdə bu vəziyyət uzunmüddətli və bəzi hallarda geri dönüşü çətin olan nəticələr yarada bilər.

Oftalmoloqun sözlərinə görə, göz problemlərinin erkən aşkarlanması və düzgün korreksiya olunması uşağın gələcək görmə keyfiyyəti üçün həlledici rol oynayır. Bu məqsədlə, ehtiyac yarandıqda eynək təyin edilir və müntəzəm nəzarət davam etdirilir.Xüsusilə göz problemi olan ailələrdə uşaqların mütəmadi olaraq müayinədən keçirilməsi daha vacibdir. Çünki irsi faktorlar bu sahədə risk qrupunu artıran əsas amillərdən biridir.

Həkim sonda valideynlərə müraciət edərək bildirir ki, göz zəifliyi nə qədər erkən aşkarlanarsa, müalicə və korreksiya bir o qədər effektiv olur və uşağın görmə qabiliyyəti normal səviyyəyə çatdırıla bilər.

Turan

Həmçinin oxuyun

TƏCİLİ! Avtomobil aşaraq yanıb, ölən və xəsarət alan var

Coşqun və Ucalın ölümünün şok detalları:200-300 metr aralı olublar -VİDEO

Bu şəxslərə əmək pensiyası xüsusi qaydada təyin olunur – AÇIQLAMA 

Qadınların 55 yaşında pensiyaya çıxması ilə bağlı AÇIQLAMA