Arıqlama iymnəsi necə vurulmalıdır?

Arıqlama iynələrinin təsiri və orqanizmə faydaları

Son illərdə artıq çəki və piylənmə problemi ilə mübarizədə arıqlama iynələrinə maraq xeyli artıb. Pasiyentlər arasında bu preparatların necə təsir göstərməsi və hansı hallarda faydalı ola biləcəyi ilə bağlı suallar da tez-tez gündəmə gəlir.

Bu barədə Oxu24.com-a açıqlama verən endokrinoloq, tibb üzrə fəlsəfə doktoru Aynur Hüseynli bildirib ki, arıqlama iynələrinin orqanizmə təsiri bir neçə fərqli mexanizm üzərindən həyata keçirilir və bu təsirlər kompleks şəkildə çəkinin azalmasına səbəb olur.

Həkimin sözlərinə görə, ilk təsir mexanizmi beyində yerləşən toxluq mərkəzi ilə bağlıdır. Bu preparatlar həmin mərkəzə təsir edərək iştahanın azalmasına səbəb olur. Nəticədə insan daha az qida qəbul edir və gündəlik kalori miqdarı təbii şəkildə aşağı düşür. Bu isə çəkinin azalmasında əsas rol oynayan faktorlardan biridir.

İkinci mühüm təsir mexanizmi qidanın mədə və bağırsaqlardakı hərəkəti ilə əlaqədardır. Bu preparatlar qidanın mədədən bağırsağa keçmə sürətini tənzimləyərək daha uzunmüddətli toxluq hissi yaradır. Pasiyentlər daha gec acır və bu da qida qəbulunun azalmasına gətirib çıxarır.

Üçüncü istiqamət isə maddələr mübadiləsi ilə bağlıdır. Preparatlar orqanizmdə metabolik proseslərə təsir göstərərək yağ yandırılmasını aktivləşdirir. Bu da xüsusilə qarın və ümumi bədən piylənməsinin azalmasına kömək edir.

Aynur Hüseynli əlavə edib ki, arıqlama iynələri təkcə çəkiyə deyil, eyni zamanda metabolik göstəricilərə də müsbət təsir göstərə bilər. Belə ki, bəzi hallarda qanda şəkər səviyyəsinin tənzimlənməsinə, xolesterinin azalmasına və qaraciyər piylənməsinin yaxşılaşmasına yardım edir.

Həkimin sözlərinə görə, bu preparatlar həmçinin qida davranış pozuntularına da təsir göstərə bilər. Xüsusilə gecə yemək vərdişi, həddindən artıq yemək istəyi və nəzarətsiz qida qəbulu kimi halların azalmasına səbəb ola bilər.

Mütəxəssis vurğulayıb ki, arıqlama iynələri yalnız həkim nəzarəti altında istifadə olunmalıdır. Çünki hər bir pasiyentin vəziyyəti fərqlidir və düzgün doza seçilmədikdə arzuolunmaz nəticələr yarana bilər. Ona görə də bu preparatlara başlamazdan əvvəl endokrinoloji müayinə və individual yanaşma mütləqdir.

Sonda həkim qeyd edib ki, arıqlama prosesində ən vacib amil sağlam həyat tərzidir. Düzgün qidalanma, fiziki aktivlik və həkim nəzarəti ilə aparılan müalicə daha davamlı və sağlam nəticələr verir.

Nigar

Həmçinin oxuyun

SON DƏQİQƏ! Prezident yüksək vəzifəyə təyinat etdi

Azərbaycanda pensiya yaşı ilə bağlı mühüm AÇIQLAMA 

DİQQƏT! 3 saat işıq olmayacaq

SON DƏQİQƏ! Seyfəddin Rəhimov dünyasını dəyişib