"Türkiyənin rəsmi qurumları bu cür təxribatların qarşısının alınması istiqamətində mövqe ortaya qoymalıdırlar"

Elxan Şahinoğlu: “Bir-birimizin daxili işlərinə qarışmamalıyıq”

Politoloq Elxan Şahinoğlu Türkiyədə Azərbaycana qarşı səsləndirilən tənqidləri və ölkəmizin diplomatik nümayəndəlikləri qarşısında keçirilən etiraz aksiyalarını iki ölkə arasındakı münasibətlər baxımından arzuolunmaz hesab edir. O, Azərbaycan və Türkiyə arasında müttəfiqlik münasibətlərinin qorunması üçün qarşılıqlı hörmətin və bir-birinin daxili işlərinə müdaxilə etməmək prinsipinin vacibliyini vurğulayıb.

Politoloq Elxan Şahinoğlu bu barədə Oxu24.com-a açıqlamasında bildirib ki, Türkiyədə Azərbaycanın daxili qərarlarına müdaxilə etməyə çalışan radikal bir kəsim mövcuddur və təəssüf ki, həmin qruplar İrandakı mühafizəkarlarla oxşar mövqedən çıxış edirlər.

Onun sözlərinə görə, Azərbaycanın İstanbulda yerləşən konsulluğu və Ankaradakı səfirliyi qarşısında keçirilən etiraz aksiyaları da narahatlıq doğurur. Politoloq hesab edir ki, bu cür addımlar iki qardaş ölkə arasındakı münasibətlərə zərər vura bilər.

Elxan Şahinoğlu qeyd edib ki, Türkiyənin rəsmi qurumları bu cür təxribatların qarşısının alınması istiqamətində mövqe ortaya qoymalıdırlar. O, indiyədək bu məsələ ilə bağlı müvafiq rəsmi açıqlama eşitmədiyini bildirib. Əksinə, Türkiyə Prezidentinin baş müşavirinin də Azərbaycan hökumətinin qərarını tənqid etdiyini vurğulayıb.

Politoloqun fikrincə, Azərbaycan və Türkiyə arasında koordinasiyanın gücləndirilməsinə ehtiyac var. O bildirib ki, iki ölkə qardaş və müttəfiq dövlətlərdir və bu müttəfiqliyin zəifləməsi yalnız hər iki ölkənin maraqlarına zidd olar, onların rəqiblərinin maraqlarına xidmət edər.

E.Şahinoğlu hesab edir ki, tərəflər arasında yaranan fikir ayrılıqları diplomatik kanallar vasitəsilə müzakirə edilməli, qarşılıqlı anlaşmanın qorunması üçün zəruri addımlar atılmalıdır. Onun sözlərinə görə, ictimai müstəvidə gərginliyin artırılması və bir-birinin qərarlarına müdaxilə edilməsi problemlərin həllinə kömək etmir.

“Əsas məqam ondan ibarətdir ki, biz bir-birimizin daxili işlərinə qarışmamalıyıq”, – deyə politoloq vurğulayıb.

Turan Etibaroğlu

Həmçinin oxuyun

Bakı sakinlərinin DİQQƏTİNƏ!19 oktyabrdan etibarən...

Türkiyə Azərbaycana dərs keçir - Bəs Ceyhan limanından İsrailə gedən neft? 

Bu, qardaş Türkiyənin birinci oyunu idi — Tarixi şəhərimiz xəritəmizdən SİLİNDİ

Tələbələrin təqaüdləri artırılacaq? - AÇIQLAMA