Lerikin meşələrində gizlənən mistik şəlalə – “Heyvalı bulaq”ın sirri  

Azərbaycanın cənubunda, Talış dağlarının sıx meşələri arasında çoxlarının adını belə eşitmədiyi, təbiətin qoynunda gizlənən möhtəşəm bir məkan var – Bibihoni şəlaləsi

Oxu24.com xəbər verir  ki,Lerik rayonunun Bibihoni kəndi ərazisində yerləşən bu şəlalə ətrafındakı sıx meşə, qayalıqlar və gur axan suları ilə insanda tamam başqa bir hiss yaradır. Bura elə bir məkandır ki, sivilizasiyanın səs-küyündən uzaqlaşdıqca yalnız meşənin xışıltısını və şəlalənin gurultusunu eşidirsiniz.

Bibihoni adının özü də bu ərazinin tarixindən və təbiətindən xəbər verir. Tədqiqatçılara görə, toponimin ilkin forması “Bibahoni” olub. Talış dilində “bib” – heyva, “honi” isə bulaq mənasını verir. Yəni Bibihoni adı “heyvalı bulaq” kimi izah olunur. Ərazidə vaxtilə heyva ağaclarının olması və bulağın da bu adla tanınması toponimin yaranması ilə əlaqələndirilir.

Amma Bibihoninin ən maraqlı xüsusiyyətlərindən biri yalnız adının mənası deyil. Burada əslində bir yox, iki şəlalə – Böyük və Kiçik Bibiyoni yerləşir. Sıx meşəliyin içində bir-birinə yaxın axan bu iki şəlalə təbiətin yaratdığı qeyri-adi mənzərəni tamamlayır. Elə buna görə də bəzi mənbələrdə onlar “iki qardaş şəlalə” kimi təqdim edilir.

Şəlaləyə gedən yol da özü-özlüyündə kiçik bir macəradır. Bibihoni kəndinə gedən yol Hamarmeşə ərazisindən ayrılır və kəndə qədər təxminən 4 kilometr davam edir. Kənddən sonra şəlaləyə qədər məsafə isə təxminən 500–600 metrdir. Əraziyə görə hündür avtomobillərlə hərəkət etmək daha əlverişlidir, bir çox insan isə bu yolu piyada qət etməyə üstünlük verir.

Meşənin dərinliyinə doğru irəlilədikcə ətrafdakı mənzərə daha da dəyişir. Ağacların arasından süzülən işıq, nəm torpağın qoxusu, qayaların üzərindəki yaşıllıq və uzaqdan eşidilən su səsi insanı tədricən gündəlik həyatın səs-küyündən uzaqlaşdırır. Bir müddət sonra isə şəlalənin səsi getdikcə güclənir və ağacların arasından gur su axını görünməyə başlayır.

Xüsusilə yağışlardan sonra Bibihoninin görünüşü daha da möhtəşəm olur.

Nigar

Həmçinin oxuyun

"Anam məktəb direktoru idi, amma dərsə buraxılmadım"

Qaz limitləri ilə bağlı YENİ TƏKLİF

Müğənnidən hicab müzakirələrinə sərt reaksiya: “Allah cəzalarını verəcək

13 oktyabrda bizi nələr gözləyir? -ULDUZ FALI