Vəkil kredit borcalanı əsgərliyə çağırıldıqda öhdəliyin aqibətini izah etdi  

Kredit götürən şəxsin hərbi xidmətə çağırılması hallarında borc öhdəliyinin aqibəti ilə bağlı suallar vətəndaşlar arasında tez-tez səslənir. Xüsusilə oğlu kreditin təxminən yarısını ödəyib, sonra isə hərbi xidmətə aparılıbsa, valideynlər bu borcun kimin üzərində qaldığını, bankın bu halı nəzərə alıb-almayacağını və kreditin dondurulmasının mümkün olub-olmadığını öyrənmək istəyirlər. Belə suallar çox vaxt maddi çətinlik içində olan, kirayədə yaşayan və gəlir imkanları məhdud ailələr tərəfindən verilir.

Vəkil Samir Süleymanov mövzu ilə bağlı Oxu24.com-a açıqlamasında bildirib ki, hərbi xidmətə getmək borcalanı kredit öhdəliyindən azad etmir. Onun sözlərinə görə, kredit götürən şəxs müqavilə əsasında vəsaiti əldə edib və ondan istifadə edib, buna görə də həmin vəsaiti qaytarmağa borcludur.

Vəkil vurğulayıb ki, borcalanın hərbi xidmətə çağırılması banka həmin pulu bağışlamaq və ya borcdan imtina etmək öhdəliyi yaratmır.

S.Süleymanov qeyd edib ki, kredit müddətli öhdəlikdir və borcalan kredit götürərkən müqavilənin müddətini bilir. Vəkilin fikrincə, vətəndaş hərbi xidmət yaşına çatdığını və ya yaxın vaxtda xidmətə çağırıla biləcəyini bildiyi halda, kredit götürərkən bu amili əvvəlcədən nəzərə almalıdır. Başqa sözlə, hərbi xidmətə getmə ehtimalı kredit götürməzdən əvvəl qiymətləndirilməli olan risklərdən biridir.

Vəkil bankların bu məsələyə münasibətini də izah edib. Onun sözlərinə görə, əsgərlik yaşı 30 yaşa qədər davam edə bilir və bank hər müraciət edən vətəndaşdan hərbi xidmətə getib-getməməsi ilə bağlı sənəd tələb etmir. Bunun səbəbi bazarda rəqabətin olmasıdır. Banklar müştəriləri cəlb etmək üçün daha əlçatan və rahat kredit məhsulları təklif etməyə, kredit portfelini artırmağa çalışırlar. S.Süleymanov bildirib ki, 30 yaşa çatmamış hər şəxsdən hərbi bilet və ya hərbi çağırışla bağlı arayış tələb edilməsi praktik baxımdan mümkün deyil, belə yanaşma tətbiq olunsa, banklar əslində bu yaş qrupuna kredit verməkdən çəkinməli olardı.

Kreditin dondurulması ilə bağlı suala münasibət bildirən vəkil qeyd edib ki, bu məsələ tərəflərin razılığı ilə həll oluna bilər. Onun izahına görə, kredit müqaviləsi tərəflərin razılığı əsasında bağlanır və eyni qaydada onun şərtləri də dəyişdirilə bilər. Müqavilənin müddəti uzadıla, ödənişlər müəyyən müddətə dondurula bilər. Lakin bu, bankla borcalan arasında razılaşma əsasında mümkündür və banka belə şərtləri qəbul etmək məcburiyyəti yaratmır.

S.Süleymanov vətəndaşlara tövsiyə edib ki, belə vəziyyətlə üzləşdikdə ödənişləri tamamilə dayandırmasınlar, əvvəlcədən banka müraciət edərək vəziyyəti izah etsinlər və kreditin şərtlərinin dəyişdirilməsi, ödəniş qrafikinin yenidən qurulması və ya müvəqqəti güzəşt imkanlarını müzakirə etsinlər. 

Vəkilin sözlərinə görə, bankla vaxtında və açıq ünsiyyət borcun yığılmasının və gələcək mübahisələrin qarşısını almağa kömək edir.

Vəkil əlavə edib ki, hər bir halda kredit müqaviləsinin konkret şərtləri nəzərə alınmalıdır. Buna görə də ailələr müqavilənin mətni ilə diqqətlə tanış olmalı, ödənişlərin tarixçəsini yoxlamalı və zərurət yarandıqda hüquqi məsləhət almalıdırlar.

Həmçinin oxuyun

ABŞ İrana zərbə endirdi 

Bu rayonlarda kommunal ödənişlər azaldıla bilər 

ŞOK! Nəvəsinin andiçməsində itkin düşmüşdü:Meyiti görün hardan tapıldı

Pensiyalar 9,3 faiz indeksləşdirilərək artırılıb   - NAZİRLİK