Zərifə Əliyeva - Xeyirxahlıq və ziyalılığın zirvəsi — Osman Azadoğlu YAZIR

CƏMİYYƏT

764

28.04.2026, 13:19

Azərbaycanın elmi və mənəvi xəritəsində elə simalar var ki, onların obrazı zaman keçdikcə daha da ucalır, xatirələrdəki yeri daha da dərinləşir. Akademik Zərifə xanım Əliyeva məhz belə nadir şəxsiyyətlərdəndir. O, təkcə oftalmologiya elminin parlaq siması deyil, həm də milli genofondumuzun saflığını, Azərbaycan qadınının intellektual gücünü və humanist ruhunu özündə birləşdirən bir mənəviyyat heykəlidir. Onun həyat yolu Şərur düzündən başlayan və bütün bəşəriyyətə nur paylayan möhtəşəm bir dastandır.

Zərifə xanım 1923-cü il aprelin 28-də Naxçıvanın qədim və zəngin tarixə malik olan Şərur rayonunun Şahtaxtı kəndində dünyaya gəlmişdir. Şahtaxtı sadə bir kənd deyil, Azərbaycanın ictimai-siyasi həyatına böyük simalar bəxş edən bir ziyalılıq mərkəzidir. Zərifə xanımın atası, görkəmli dövlət xadimi və fədakar həkim Əziz Əliyevdən aldığı ailə tərbiyəsi, onun daxilindəki məsuliyyət hissini və elmə olan sevgisini hələ uşaq yaşlarından formalaşdırmışdı. O, bu torpağın saflığını və mərdliyini bütün ömrü boyu özü ilə daşıdı, hər addımında doğma köklərinə sadiqlik nümayiş etdirdi.

Zərifə Əliyevanın elmi fəaliyyəti Azərbaycan tibb elminin ən parlaq səhifələrindən biridir. O, o dövrdə geniş yayılmış və insanların görmə qabiliyyətini itirməsinə səbəb olan traxoma xəstəliyinə qarşı amansız mübarizə aparmışdır. Onun rəhbərliyi ilə həyata keçirilən elmi-tədqiqat işləri minlərlə insanın dünyanı yenidən rəngli görməsinə vəsilə olmuşdur. Onun əsas elmi nailiyyətlərindən biri də peşə oftalmologiyası sahəsindədir. Zərifə xanım dünyada ilk dəfə kimya və neft sənayesində çalışan insanların görmə orqanlarının qorunması mexanizmlərini tədqiq etmiş və bu sahədə fundamental əsərlər yaratmışdır. Lakin o, xəstələri üçün sadəcə bir diaqnoz qoyan həkim deyildi; o, xəstənin daxili dünyasına nüfuz edən, onlara ümid və təskinlik verən bir şəfa mənbəyi idi.

Zərifə xanım Əliyevanın Azərbaycan tarixindəki yeri həm də onun dövlətçiliyimizin sarsılmaz sütunları olan iki böyük liderlə olan mənəvi bağlılığı ilə ölçülür. Müasir Azərbaycan dövlətinin qurucusu Ümummilli Lider Heydər Əliyev üçün Zərifə xanım təkcə vəfalı bir ömür-gün yoldaşı deyil, həm də ən çətin anlarda ona mənəvi dayaq olan, yoluna nur saçan bir həyat yoldaşı idi. Heydər Əliyev kimi nəhəng bir siyasətçinin polad iradəsinin arxasında Zərifə xanımın zərifliyi, müdrikliyi və sonsuz səbri dayanırdı. Onların ailəsi Azərbaycan cəmiyyəti üçün əsl sevgi, sədaqət və qarşılıqlı hörmət etalonudur. Bu gün Azərbaycanı qələbədən-qələbəyə aparan, xalqımızın qürur mənbəyi olan Prezident İlham Əliyevin bir şəxsiyyət kimi formalaşmasında Zərifə xanımın əməyi əvəzsizdir. O, oğluna təkcə bilik və təhsil deyil, həm də xalqa xidmət etmək fəlsəfəsini, humanistliyi və vətən sevgisini aşılamışdır. Prezidentimizin hər bir addımında, onun xalqla olan səmimi ünsiyyətində və strateji müdrikliyində Zərifə xanımın genetik və mənəvi irsinin izlərini görmək mümkündür.

Zərifə Əliyeva mənsub olduğu xalqın rifahı üçün yaşayan, elmi və əxlaqı ilə hər kəsə nümunə olan bir dahi idi. Onun adı bu gün təkcə küçələrdə, mərkəzlərdə və kitablarda deyil, minlərlə insanın minnətdarlıq dolu baxışlarında yaşayır. 28 aprel tarixi bizə bir daha xatırladır ki, xeyirxahlıq və ziyalılıq birləşəndə ölümsüzlük yaranır. Akademik Zərifə Əliyeva məhz o ölümsüzlüyün Azərbaycan dilindəki adıdır.